എഴുപത്തൊന്നാമത് നെഹ്റു ട്രോഫി വള്ളംകളി ഇന്ന് ആലപ്പുഴ പുന്നമടക്കായലില് നടക്കും.രാവിലെ 11ന് മത്സരങ്ങള് തുടങ്ങും.ചെറുവള്ളങ്ങളുടെ ഹീറ്റ്സാണ് ആദ്യം. രണ്ടിന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. സിംബാബ്വേ വ്യവസായ വാണിജ്യ ഡെപ്യൂട്ടി മന്ത്രി രാജേഷ്കുമാർ ഇന്ദുകാന്ത് മോദി, അംബാസഡർ സ്റ്റെല്ല നിക്കാമോ എന്നിവർ അതിഥികളാകും. തുടർന്ന് ചുണ്ടൻവള്ളങ്ങളുടെ ഹീറ്റ്സ്, ചെറുവള്ളങ്ങളുടെ ഫൈനല് മത്സരങ്ങള് നടക്കും. വൈകുന്നേരം നാലു മുതലാണ് ചുണ്ടൻവള്ളങ്ങളുടെ ഫൈനല്.71 വള്ളങ്ങളാണു മത്സരിക്കുന്നത്. ചുണ്ടൻവിഭാഗത്തില് 21 വള്ളങ്ങളുണ്ട്. ചുരുളൻ- മൂന്ന്, ഇരുട്ടുകുത്തി എ- അഞ്ച്, ഇരുട്ടുകുത്തി ബി- 18, ഇരുട്ടുകുത്തി സി- 14, വെപ്പ് എ- അഞ്ച്, വെപ്പ് ബി- മൂന്ന്, തെക്കനോടി തറ- ഒന്ന്, തെക്കനോടി കെട്ട്- ഒന്ന് എന്നിങ്ങനെയാണ് മറ്റു വിഭാഗങ്ങളിലെ വള്ളങ്ങളുടെ എണ്ണം.