കേരള സാമൂഹ്യ സുരക്ഷാ മിഷന് കീഴിൽ നടപ്പിലാക്കി വരുന്ന ‘ആശ്വാസകിരണം’ പദ്ധതി പ്രകാരമുള്ള പ്രതിമാസ ധനസഹായം 600 രൂപയിൽ നിന്ന് 1000 രൂപയായി വർധിപ്പിച്ച് സർക്കാർ ഉത്തരവിറക്കി. ഗുരുതരമായ ശാരീരിക-മാനസിക വെല്ലുവിളികൾ നേരിടുന്നവർ, നൂറു ശതമാനം അംഗപരിമിതർ, കിടപ്പിലായ രോഗികൾ, കാൻസർ രോഗികൾ, ഓട്ടിസം, സെറിബ്രൽ പാൾസി തുടങ്ങിയ അവസ്ഥകളാൽ ബുദ്ധിമുട്ടുന്നവർ, വാർദ്ധക്യം മൂലം ദൈനംദിന കാര്യങ്ങൾക്ക് പരസഹായം ആവശ്യമുള്ളവർ എന്നിവരെ പരിചരിക്കുന്നവർക്കാണ് ഈ ധനസഹായം ലഭിക്കുന്നത്. 2026-27 സാമ്പത്തിക വർഷത്തെ ബജറ്റ് പ്രഖ്യാപനത്തിന്റെ അടിസ്ഥാനത്തിലാണ് ധനസഹായ തുക വർധിപ്പിച്ചുകൊണ്ടുള്ള സർക്കാർ തീരുമാനം. ഈ ഉത്തരവ് തീയതി മുതൽ വർധിപ്പിച്ച തുക പ്രാബല്യത്തിൽ വരുന്നതാണ്.