കോട്ടയം: സ്വന്തമായി വീടോ സ്ഥിരവരുമാനമോ ഇല്ലാത്ത വിധവകളുടെ ജീവിതം മെച്ചപ്പെടുത്താനും സംരക്ഷിക്കാനുമായി വനിതാ-ശിശുവികസന വകുപ്പ് നടപ്പാക്കുന്ന അഭയകിരണം പദ്ധതിയിലേക്ക് അപേക്ഷിക്കാം. ഭർത്താവ് മരിച്ച, ഭർത്താവ് ഉപേക്ഷിച്ച് ഏഴു വർഷം കഴിഞ്ഞ സാധുക്കളായ വിധവകൾക്ക് അഭയസ്ഥാനം നൽകുന്ന ബന്ധുവിന് മാസം 1000 രൂപ പദ്ധതിയിലൂടെ ലഭിക്കും. ഡിസംബർ 15നകം www.schemes.wcd.kerala.gov.in എന്ന വെബ്സൈറ്റിലൂടെ ഓൺലൈനായാണ് അപേക്ഷ നൽകേണ്ടത്. സംരക്ഷിക്കപ്പെടുന്ന വിധവകൾക്ക് 50 വയസിന് മുകളിൽ പ്രായമുണ്ടായിരിക്കണം. വിധവയുടെ വാർഷിക വരുമാനം ഒരു ലക്ഷം രൂപയിൽ കവിയാൻ പാടില്ല. സർവീസ് പെൻഷൻ/ കുടുംബ പെൻഷൻ എന്നിവ കൈപ്പറ്റുന്നവരാകരുത്. പ്രായപൂർത്തിയായ മക്കൾ ഉണ്ടാകാൻ പാടില്ല. വിധവയെ സംരക്ഷിക്കുന്ന അപേക്ഷകർ ക്ഷേമപെൻഷനുകളോ വനിതാ-ശിശു വികസന വകുപ്പിന്റെ മറ്റ് ധനസഹായമോ ലഭിക്കുന്നവരാകരുത്. താമസിക്കുന്നതിന് സ്വന്തമായി ചുറ്റുപാടോ സൗകര്യമോ ഉണ്ടായിരിക്കരുത്. ഏതെങ്കിലും സ്ഥാപനത്തിൽ താമസക്കാരിയായി കഴിയുന്ന വിധവ ധനസഹായത്തിന് അർഹരല്ല.ആധാർ കാർഡിന്റെയും റേഷൻ കാർഡിന്റെയും പകർപ്പുകൾ അപ്ലോഡ് ചെയ്യണം. മുൻവർഷം ധനസഹായം ലഭിച്ചവർ വീണ്ടും അപേക്ഷിക്കേണ്ടതാണ്. വിശദവിവരത്തിന് www.schemes.wcd.kerala.gov.in എന്ന വെബ്സൈറ്റിലും അങ്കണവാടി / ഐസിഡിഎസ് എന്നിവിടങ്ങളിലും ലഭിക്കും.