തിരുവല്ല ശ്രീവല്ലഭക്ഷേത്ര ഉത്സവത്തിനിടെ ആന ഇടഞ്ഞ സംഭവത്തില്‍ വനം വകുപ്പ് കേസെടുത്തു. ദേവസ്വം ജീവനക്കാരടക്കം നാലുപേരെ പ്രതിയാക്കിയാണ് കേസെടുത്തിരിക്കുന്നത്. ക്ഷേത്രം മാനേജര്‍, അസിസ്റ്റന്റ് മാനേജരുടെ ചുമതല വഹിക്കുന്ന ജീവനക്കാരി, ആന ഉടമ, പാപ്പാന്‍ എന്നിവരാണ് കേസിലെ പ്രതികള്‍.
ഞായറാഴ്ച രാത്രി എട്ടിനാണ് ശ്രീവേലി എഴുന്നള്ളത്തിനിടെ വേണാട്ടുമുറ്റം ഉണ്ണിക്കുട്ടന്‍ എന്ന ആന, മുന്‍പേ പോയ ആനയെ കുത്തുകയും ഇടഞ്ഞോടുകയും ചെയ്തത്. നാട്ടാന പരിപാലന ചട്ടലംഘനം, വന്യജീവി സംരക്ഷണ നിയമം പാലിക്കാത്തത്. ഇവ മുന്‍നിര്‍ത്തിയാണ് കേസ്.
ഇടഞ്ഞ ആന ഉത്സവത്തിനെത്തിച്ച രണ്ടാമത്തെ ആനയെ കുത്തിയതോടെ ആളുകള്‍ പരിഭ്രാന്തരായി ഓടി. കീഴ്ശാന്തിമാര്‍ ഉള്‍പ്പെടെയുള്ള ഏഴു പേര്‍ക്ക് പരിക്കേറ്റു. ക്ഷേത്രത്തിനുള്ളില്‍ ഉണ്ടായിരുന്ന ആളുകളെല്ലാം പുറത്തിറക്കി ഗേറ്റ് അടച്ചതിനാല്‍ വലിയ അപകടം ഒഴിവായി. ആനകളില്‍ ഒന്നിനെ പെട്ടെന്ന് തളയ്ക്കുകയായിരുന്നു.