പാർലമെന്റിന്റെ ബജറ്റ് സമ്മേളനം ഇന്ന് തുടങ്ങും.
ഞായറാഴ്ചചേർന്ന സർവകക്ഷി യോഗത്തില് പ്രതിപക്ഷപാർട്ടികളുടെ സഹകരണം അഭ്യർഥിച്ച് കേന്ദ്രസർക്കാർ.
സഹകരിക്കുന്നതിന് തടസ്സമില്ലെന്നും സുപ്രധാന ജനകീയ വിഷയങ്ങള് ഉന്നയിക്കാൻ അനുവദിക്കണമെന്നും കോണ്ഗ്രസ് അടക്കമുള്ള പ്രതിപക്ഷകക്ഷികള് ആവശ്യപ്പെട്ടു.
ഡെപ്യൂട്ടിസ്പീക്കർസ്ഥാനം ഒഴിച്ചിടരുതെന്നും ബജറ്റ് സമ്മേളനത്തില് പ്രതിപക്ഷാംഗത്തെ ഡെപ്യൂട്ടി സ്പീക്കറായി നിയമിക്കണമെന്നും ആവശ്യപ്പെട്ടു.
ഇതിന് സർക്കാർ മറുപടി നല്കിയില്ല.വിരമിച്ച ജഡ്ജിമാർ രാഷ്ട്രീയത്തിലിറങ്ങുന്നത് വിലക്കുന്നതുമുതല് പുതിയ ക്രിമിനല്നിയമത്തില് ഭർത്തൃബലാത്സംഗം കുറ്റകരമാക്കണമെന്നുവരെ ആവശ്യപ്പെടുന്ന സ്വകാര്യബില്ലുകള് പാർലമെന്റിന്റെ ബജറ്റ് സമ്മേളനത്തിലുണ്ടാകും.
നിർമിതബുദ്ധി, ഡീപ് ഫെയ്ക്ക്, പൗരത്വനിയമഭേദഗതി തുടങ്ങി ഒട്ടേറെ വിഷയങ്ങളുമായി ബന്ധപ്പെട്ട 23 സ്വകാര്യബില്ലുകളാണ് തിങ്കളാഴ്ച തുടങ്ങുന്ന സമ്മേളനത്തില് രാജ്യസഭയില് ലിസ്റ്റുചെയ്തിരിക്കുന്നത്.
സ്വകാര്യബില്ലുകള് നിയമമാകുന്നത് അത്യപൂർവമാണ്. പാർലമെന്റ് ചരിത്രത്തില് 14 സ്വകാര്യബില്ലുകളേ ഇരുസഭകളും പാസാക്കിയിട്ടുള്ളൂ.
സർക്കാർബില്ലുകളില് പ്രതിനിധാനംചെയ്യപ്പെടാത്ത വിഷയങ്ങള് നിയമമാക്കാൻ അംഗങ്ങളെ പ്രാപ്തരാക്കുന്നതാണ് സ്വകാര്യബില്ലുകള്.