വൈദ്യുത അപകടങ്ങള്‍ കുറയ്ക്കുന്നതിന് ബോധവത്ക്കരണ പരിപാടികളും ക്യാമ്പയിനുകളും ഉള്‍പെടെ മികച്ച പ്രവര്‍ത്തനം നടത്തിയ ജില്ലാ ഓഫീസിനുള്ള വൈദ്യുതി വകുപ്പിന്റെ സംസ്ഥാന വൈദ്യുതി സുരക്ഷാ അവാര്‍ഡ് 2024 പാലക്കാട് ഇലക്ട്രിക്കല്‍ ഇന്‍സ്‌പെക്ടറേറ്റ് ഓഫീസിന്.
തിരുവനന്തപുരം സത്യന്‍ സ്മാരക ഹാളില്‍ നടന്ന സംസ്ഥാനതല വൈദ്യുത സുരക്ഷാവാരം ഉദ്ഘാടന പരിപാടിയില്‍ വെച്ച് വൈദ്യുതി വകുപ്പ് മന്ത്രി കെ.കൃഷ്ണന്‍കുട്ടി പുരസ്‌കാരം വിതരണം ചെയ്തു. ഇലക്ട്രിക്കല്‍ ഇന്‍സ്‌പെക്ടര്‍ കെ.ടി.സന്തോഷ്, അസിസ്റ്റന്റ് ഇലക്ട്രിക്കല്‍ ഇന്‍സ്‌പെക്ടര്‍ പി.നൗഫല്‍ എന്നിവര്‍ പുരസ്‌കാരം സ്വീകരിച്ചു.
2022-24 കാലയളവില്‍ പാലക്കാട് ജില്ലാ ഓഫീസിന്റെ നേതൃത്വത്തില്‍ 48 ബോധവത്ക്കരണ ക്ലാസുകളാണ് നടത്തിയത്. എണ്ണായിരത്തോളം പേരിലേക്ക് ബോധവത്കരണ സന്ദേശം എത്തിക്കാന്‍ കഴിഞ്ഞു.
കുടുംബശ്രീ, ഗ്രാമസഭ, വയര്‍മാന്‍ കൂട്ടായ്മകള്‍, കെഎസ്ഇബി ജീവനക്കാര്‍ തുടങ്ങി എല്ലാ മേഖലകളിലേക്കും വൈദ്യുതി സുരക്ഷാ ബോധവല്‍ക്കരണം എത്തിക്കാനായി. ഇതിന്റെ ഫലമായി ജില്ലയിലെ 2022-23 വര്‍ഷത്തേക്കാളും വൈദ്യുത അപകടങ്ങള്‍ 30 ശതമാനം കുറക്കാന്‍ കഴിഞ്ഞിട്ടുണ്ട്