എറണാകുളം – അങ്കമാലി അതിരൂപതയിൽ സുപ്രധാന നിയമനങ്ങൾ: ഫാ. ജേക്കബ് പാലയ്ക്കാപിള്ളിയെ അതിരൂപതയുടെ പ്രോട്ടോസിഞ്ചെലൂസായും, ഫാ. ജോഷി പുതുവയലിനെ ചാൻസലറായും നിയമിച്ചു. ഫാ. സൈമൺ പള്ളുപേട്ടയെ അസിസ്‌റ്റന്ററ് ഫിനാൻസ് ഓഫീസറായും ഫാ. ജിസ്മോൻ ആരംപള്ളിയെ സെക്രട്ടറിയായും നിയമിച്ചു.
അതേസമയം, അതിരൂപതാ കാര്യാലയത്തിൽ 2022 ആഗസ്‌റ്റ് മുതൽ പ്രോട്ടോസിഞ്ചെലൂസായി ശുശ്രൂഷ ചെയ്‌തു വരികയായിരുന്ന ഫാ. വർഗീസ് പൊട്ടക്കലിനെയും സിഞ്ചല്ലൂസ് ആയിരുന്ന ഫാ. ആൻ്റണി പെരുമായനേയും ചാൻസലർ ആയിരുന്ന ഫാ. മാർട്ടിൻ കല്ലുങ്കലിനേയും വൈസ്‌ ചാൻസലർ ആയിരുന്ന ഫാ. സോണി മഞ്ഞളിയേയും അസിസ്‌റ്റൻ്റ് ഫിനാൻസ് ഓഫീസറും സെക്രട്ടറിയുമായിരുന്ന ഫാ. പിൻ്റോ പുന്നക്കലിനേയും അവർ വഹിച്ചിരുന്ന സ്‌ഥാനങ്ങളിൽനിന്നു വിടുതൽ നൽകിയതായി അപ്പസ്ത്തോലിക് അഡ്മിനിസ്ട്രേറ്റർ മാർ ബോസ്കോ പുത്തൂർ അറിയിച്ചു.
അതിരൂപതയിൽ തുടരുന്ന പ്രതിസന്ധിയിൽ തങ്ങളുടെ ഉത്തരവാദിത്വങ്ങൾ തുടർന്നു നിർവഹിക്കുന്നതിലുള്ള ബുദ്ധിമുട്ട് അതിരൂപതാ കാര്യാലയത്തിൽ സേവനം ചെയ്യുന്ന വൈദികർ രേഖാമൂലം അറിയിച്ചതിനാലാണ് അവരുടെ സ്‌ഥാനങ്ങളിൽ പുതിയ നിയമനങ്ങൾ നടത്തിയത്.
ഇപ്പോഴത്തെ സാഹചര്യത്തിൽ അതിരൂപതാ കാര്യാലയത്തിൻ്റെ സുഗമമായ നടത്തിപ്പിനു വേണ്ടി പോലീസിന്റെ സാന്നിധ്യം തുടർന്നും ഉണ്ടായിരിക്കുന്നതാണ്. അതിരൂപതാ കച്ചേരിയെ വിവിധ കാര്യങ്ങൾക്കായി സമീപിക്കേണ്ടവർക്ക് അതിനുള്ള എല്ലാ സാഹചര്യങ്ങളും ഉണ്ടായിരിക്കും. തന്റെ അംഗീകാരം ഇല്ലാത്ത ഒരു യോഗവും കൂടിച്ചേരലും അതിരൂപതാ കാര്യാലയത്തിൽ അനുവദിക്കുന്നതല്ലെന്നും വൈദികരും സമർപ്പിതരും അല്‌മായരും ഇക്കാര്യങ്ങളോട് സഹകരിക്കണമെന്നും അപ്പസ് ത്തോലിക് അഡ്മിനിസ്ട്രേറ്റർ അറിയിച്ചു.