മണിക്കൂറുകളായി പെയ്യുന്ന കനത്ത മഴയെ തുടർന്ന് പാമ്പാടി കാളച്ചന്ത ഭാഗത്ത് വെള്ളം പൊങ്ങി.ഞായറാഴ്ച ഉച്ചയോടെ തുടങ്ങിയ കനത്ത മഴയ്ക്ക് ശമനമില്ലാതായതോടെ കോട്ടയം ജില്ലയുടെ പല ഭാഗങ്ങളിലും കൈത്തോടുകൾ കരകവിഞ്ഞ് റോഡിൽ വെള്ളം കയറുന്നു.പാമ്പാടി കാളച്ചന്ത തോട് കരകവിഞ്ഞതോടെ വട്ടമലപ്പടി – സിഎസ്ഐ പള്ളി റോഡ്, കത്തീഡ്രൽ- മീനടം റോഡ് തുടങ്ങിയ പാതകളിൽ വെള്ളം കയറി.ഇതേ തുടർന്ന് ഗതാഗതം അടക്കം തടസ്സപ്പെട്ടു. കാളച്ചന്ത തോട്ടിൽ മാലിന്യങ്ങളും അടിഞ്ഞ് ഒഴുക്ക് തടസ്സപ്പെട്ടതോടെയാണ് കെ കെ റോഡിനോട് ബന്ധിപ്പിക്കുന്ന റോഡുകളിൽ വെള്ളം കയറിയത്. സമീപത്തെ നിരവധി കടകൾ അടക്കമുള്ള സ്ഥാപനങ്ങളിൽ വെള്ളം കയറിയിട്ടുണ്ട്.കൂടാതെ പല വീടുകളും വെള്ളപ്പൊക്ക ഭീഷണിയിലുമാണ്.