ലിറ്റില് കൈറ്റ്സ് അവാര്ഡുകള് ഇന്ന് വിതരണം ചെയ്യും.കേരള ഇൻഫ്രാസ്ട്രക്ചർ ആൻഡ് ടെക്നോളജി ഫോർ എഡ്യൂക്കേഷൻ (കൈറ്റ്) ലിറ്റില് കൈറ്റ്സ് യൂണിറ്റുകള്ക്ക് നല്കുന്ന 2026-ലെ സംസ്ഥാന-ജില്ലാതല അവാർഡുകള് മുഖ്യമന്ത്രി വി.ഡി.സതീശൻ വിതരണം ചെയ്യും. ഇന്നു രാവിലെ 10ന് നിയമസഭാ സമുച്ചയത്തിലെ ആർ. ശങ്കരനാരായണൻ തമ്പി ഹാളിലാണ് ചടങ്ങ്.സംസ്ഥാനത്തെ 2,284 സർക്കാർ, എയ്ഡഡ് ഹൈസ്കൂളുകളില് നടപ്പാക്കുന്ന ‘ലിറ്റില് കൈറ്റ്സ്’ ഐടി ക്ലബുകള് കുട്ടികളുടെ രാജ്യത്തെ ഏറ്റവും വലിയ ഐടി ശൃംഖലയാണ്. പൊതുവിദ്യാഭ്യാസ മന്ത്രി എൻ. ഷംസുദ്ദീൻ അധ്യക്ഷത വഹിക്കും. നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ മുഖ്യാതിഥിയാകും. ഡെപ്യൂട്ടി സ്പീക്കർ ഷാനിമോള് ഉസ്മാൻ മുഖ്യപ്രഭാഷണം നടത്തും.
ആർട്ടിഫിഷ്യല് ഇന്റലിജൻസ്, റോബോട്ടിക്സ്, ഇന്റർനെറ്റ് ഓഫ് തിങ്സ് (ഐഒടി) തുടങ്ങിയ മേഖലകളിലെ പരിശീലനങ്ങള്, സാമൂഹിക ഇടപെടലുകള്, സ്കൂള് വിക്കി, ഡിജിറ്റല് മാഗസിൻ, ഹൈടെക് ക്ലാസ് മുറികളുടെ പരിപാലനം എന്നിവയിലെ മികവിന്റെ അടിസ്ഥാനത്തിലാണ് അവാർഡുകള് പ്രഖ്യാപിച്ചിരിക്കുന്നത്.സംസ്ഥാനതലത്തില് ഒന്ന്, രണ്ട്, മൂന്ന് സ്ഥാനങ്ങള് നേടുന്ന സ്കൂളുകള്ക്ക് യഥാക്രമം 2.5 ലക്ഷം രൂപ, 2 ലക്ഷം രൂപ, 1.5 ലക്ഷം രൂപ വീതം ലഭിക്കും.ജില്ലാതലത്തില് ഒന്നാം സ്ഥാനത്തിന് 40,000 രൂപയും രണ്ടാം സ്ഥാനത്തിന് 30,000 രൂപയും ട്രോഫിയും സർട്ടിഫിക്കറ്റും നല്കും.ചടങ്ങ് കൈറ്റ് വിക്ടേഴ്സ് ചാനലിലും കൈറ്റിന്റെ വെബ് പ്ലാറ്റ്ഫോമുകളിലും തത്സമയം സംപ്രേഷണം ചെയ്യും.
