വിശ്വാസ സമൂഹത്തിന് അനുഗ്രഹ പുണ്യമേകി മണർകാട് പള്ളിയിൽ നട തുറന്നു.
കോട്ടയം മണർകാട് സെന്റ് മേരീസ് യാക്കോബായ സുറിയാനി കത്തീഡ്രലിലെ എട്ടുനോമ്പ് പെരുന്നാളിനോടനുബന്ധിച്ചുള്ള ചരിത്രപ്രസിദ്ധമായ നടതുറക്കൽ ശുശ്രൂഷ ഭക്തിസാന്ദ്രമായി.
11.30 ന് ഉച്ചനമസ്‌കാരത്തെ തുടർന്ന് സുന്നഹദോസ് സെക്രട്ടറിയും, കോട്ടയം ഭദ്രാസനാധിപനുമായ തോമസ് മോർ തിമോത്തിയോസ്, കോഴിക്കോട് ഭദ്രാസനാധിപൻ പൗലോസ് മാർ ഐറേനിയോസ് എന്നീവരുടെ കാർമ്മികത്വത്തിലായിരുന്നു നട തുറക്കൽ ശുശ്രൂഷ നടന്നത്.
കത്തീഡ്രലിന്റെ പ്രധാന മദ്ബഹായിലെ ത്രോണോസിൽ സ്ഥാപിച്ചിരിക്കുന്ന വിശുദ്ധ ദൈവമാതാവിന്റെയും ഉണ്ണിയേശുവിന്റെയും ഛായാചിത്രം പൊതുദർശനത്തിനായി വർഷത്തിൽ ഒരിക്കൽ മാത്രം തുറക്കുന്ന ചടങ്ങാണ് നടതുറക്കൽ. ശുശ്രൂഷയിൽ പങ്കാളികളാക്കാൻ ആയിരക്കണക്കിനാളുകളാണ് മണർകാട് പള്ളിയിലേക്ക് എത്തി ചേർന്നത്..
സ്ലീബാ പെരുന്നാൾ ദിനമായ സെപ്തംബർ 14 ന് വൈകിട്ട് അ‍ഞ്ചിന് സന്ധ്യാ പ്രാർഥനയോടെ നടയടയ്ക്കും.