എറണാകുളം: പെരുമ്പാവൂരില്‍ ലഹരി വില്‍പന ആരോപിച്ച്‌ മൂന്ന് യുവാക്കളെ തടഞ്ഞുനിര്‍ത്തി തലമുണ്ഡനം ചെയ്ത സംഭവത്തില്‍ പൊലീസ് കേസെടുത്തു. ബുധനാഴ്ച വൈകിട്ട് നാലരയോടെയായിരുന്നു സംഭവം. വാഴക്കുളം മഞ്ഞപ്പെട്ടി സ്വദേശികളായ മൂന്ന് യുവാക്കളുടെ പരാതിയില്‍ കണ്ടാല്‍ തിരിച്ചറിയാവുന്ന ആറുപേര്‍ക്കെതിരെയാണ് പെരുമ്പാവൂര്‍ പൊലീസ് എഫ്‌ഐആര്‍ രജിസ്റ്റര്‍ ചെയ്തത്.കഞ്ചാവ് വില്‍ക്കാനോ വാങ്ങാനോ എത്തിയവരാണെന്ന് ആരോപിച്ചാണ് യുവാക്കളെ തടഞ്ഞുനിര്‍ത്തി സമീപത്തെ ഒരു മുറിയിലേക്ക് കൊണ്ടുപോയതെന്നാണ് പരാതി. അവിടെ മുട്ടുകാലില്‍ നിര്‍ത്തിയശേഷം സമീപത്തെ കടയില്‍നിന്ന് ഒരു ബാര്‍ബറെ വിളിച്ചുവരുത്തി ഇവരുടെ തലമുണ്ഡനം ചെയ്യിച്ചുവെന്നും പരാതിയില്‍ പറയുന്നു. സംഭവത്തില്‍ ശാരീരികവും മാനസികവുമായി പീഡനം നേരിട്ടതായും യുവാക്കള്‍ ആരോപിക്കുന്നു.സംഭവത്തില്‍ പൊലീസ് അന്വേഷണം ആരംഭിച്ചിട്ടുണ്ട്. പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത പൊലീസ് പ്രതികളെ കണ്ടെത്താനുള്ള നടപടികള്‍ പുരോഗമിക്കുകയാണെന്ന് അറിയിച്ചു. അതേസമയം, മൂന്ന് യുവാക്കള്‍ സംഭവസ്ഥലത്ത് എത്തിയതിന്റെ സാഹചര്യവും അന്വേഷണത്തിന്റെ ഭാഗമായി പരിശോധിച്ചുവരികയാണ്.