കേരളത്തിലെ കോൺഗ്രസ് രാഷ്ട്രീയത്തിലും മക്കൾരാഷ്ട്രീയം കടന്നുവരുന്നത് കെ കരുണാകരനിലൂടെയാണ്. കരുണാകരൻ തന്റെ മക്കളെ രണ്ടുപേരേയും രാഷ്ട്രീയത്തിൽ കൊണ്ടുവന്നുവെങ്കിലും മകൾ പത്മജ തെരഞ്ഞെടുപ്പു രാഷട്രീയത്തിൽ തീരെ ശോഭിച്ചില്ല. 2004-ലാണ് അവർ മുകുന്ദപുരം മണ്ഡലത്തിൽ നിന്ന് ലോക്‌സഭയിലേക്ക് മത്സരിച്ചു, പക്ഷേ സിപിഐ എമ്മിലെ ലോനപ്പൻ നമ്പാടനോട് പരാജയപ്പെടുകയാണ് ഉണ്ടായത്. തുടർന്ന്
2016 ലും 2021 ലും രണ്ട് തവണ തൃശൂർ മണ്ഡലത്തിൽ നിന്ന് കേരള നിയമസഭാ തെരഞ്ഞെടുപ്പിൽ മത്സരിച്ച് പരാജയപ്പെട്ടു. പിന്നീട് അവരെ പരിഗണിച്ചില്ല എന്ന പരിഭവം പല മാധ്യമങ്ങളോട് പറയുകയും ചെയ്തു. സഹോദരൻ കെ മുരളീധരനും പത്മജയുടെ രാഷ്ട്രീയ പ്രവേശനത്തിനു വലിയ താത്പര്യം ഒരു കാലത്തും കാണിച്ചിരുന്നില്ല
പത്മജ ഒരു സമയത്ത് ടെലിവിഷൻ നിർമ്മാതാവായും അറിയപ്പെട്ടിരുന്നു. അവരും മല്ലികാസുകുമാരനും ചേർന്ന് ചില ടെലിവിഷൻ പരമ്പരകളൊക്കെ ഇടക്കാലത്ത് നിർമ്മിച്ചിരുന്നു.
തിരുവനന്തപുരം വിമൻസ് കോളേജിൽ നിന്ന് ആർട്‌സിൽ (ഹിന്ദി) ബിരുദം
നേടിയിട്ടുള്ള പത്മജയ്ക്ക് ബിജെപി ദേശീയ രാഷ്ട്രീയത്തിലേക്ക് കടക്കുമ്പോൾ ബി എ ഹിന്ദി തുണയാകുമോ എന്ന് കാത്തിരുന്ന് കാണാം.
ഒരു സമയത്ത് കിങ് മേക്കറായിരുന്ന കരുണാകരനെപ്പോലും നിയന്ത്രിച്ചിരുന്നത് മകൾ പത്മജയായിരുന്നു. അവർ നഴ്‌സസ് യൂണിയൻ പോലെ മറ്റ് 15 ട്രേഡ് യൂണിയനുകളുടെ തലപ്പത്ത് വിരാജിച്ചിരുന്നു.
എതിരാളികളായ കോൺഗ്രസ് വിഭാഗങ്ങളായ കരുണാകരൻ, ആന്റണി ഗ്രൂപ്പുകൾ തമ്മിലുള്ള ഭിന്നത പരിഹരിക്കാൻ പാർട്ടി പ്രവർത്തകരുമായി അനുനയ ചർച്ചകൾ നടത്തുന്നത് പോലും പത്മജയായിരുന്നു. കരുണാകരൻ ജീവിച്ചരുന്നകാലത്ത് അദ്ദേഹത്തിന്റെ പിൻഗാമിയായി കോൺഗ്രസിലെ വലിയൊരു വിഭാഗം കണ്ടിരുന്നത് പത്മജ വേണുഗോപാലിനെയായിരുന്നു. കെ കരുണാകരനെന്ന രാഷ്ട്രീയ ഭീഷ്മാചാര്യൻ വീണതോടെ പത്മജയുടെ പ്രാധാന്യം അവസാനിച്ചു.
എകെ ആന്റണിയുടെ മകനും കെ കരുണാരന്റെ മകളും കോൺഗ്രസ് രാഷ്ട്രീയം വിട്ട് ബി ജെപിയിലേക്ക് ചേക്കേറുമ്പോൾ കേരളത്തിലെ കോൺഗ്രസ് രാഷ്ട്രീയം പഠിക്കുന്നവർക്ക് വലിയ കൗതുകക്കാഴ്ചയായി മാറുകയാണ് ഇപ്പോഴത്തെ പ്രായോഗിക രാഷ്ട്രീയം.