പാലക്കാട് റെയിൽവേ ഡിവിഷൻ വിഭജിച്ച് റെയിൽവേ ബോർഡ് ഉത്തരവിറക്കി. ഇതുപ്രകാരം ഡിവിഷന്റെ ഭാഗമായിരുന്ന മംഗളൂരു മേഖലയെ ദക്ഷിണ പശ്ചിമ റെയിൽവേയുടെ കീഴിലുള്ള മൈസൂരു ഡിവിഷനിലേക്ക് മാറ്റാൻ തീരുമാനിച്ചു. വരുന്ന ഒക്ടോബർ ഒന്നുമുതൽ പുതിയ മാറ്റം നിലവിൽ വരും. മംഗളൂരു തുറമുഖം വഴിയുള്ള ചരക്കുനീക്കവും ഉയർന്ന വരുമാനമുള്ള പനമ്പൂർ സ്റ്റേഷനും ഉൾപ്പെടെയുള്ളവ നഷ്ടപ്പെടുന്നത് പാലക്കാട് ഡിവിഷന്റെ സാമ്പത്തിക ഭദ്രതയെയും ഭാവി വികസനങ്ങളെയും സാരമായി ബാധിക്കുമെന്ന ആശങ്ക ശക്തമാണ്. ജനപ്രതിനിധികളെ പോലും അറിയിക്കാതെ എടുത്ത ഈ ഏകപക്ഷീയമായ തീരുമാനത്തിനെതിരെ ഇതിനകം തന്നെ രാഷ്ട്രീയ രംഗത്തുനിന്നും ജനപ്രതിനിധികളുടെ ഭാഗത്തുനിന്നും കനത്ത പ്രതിഷേധം ഉയർന്നിട്ടുണ്ട്.