കടയ്ക്കൽ ദേവി ക്ഷേത്രത്തിലെ രാഷ്ട്രീയ വിവാദവുമായി ബന്ധപ്പെട്ട വിഷയത്തിൽ ക്ഷേത്ര ഉപദേശക സമിതിയോട് തിരുവിതാംകൂർ ദേവസ്വം ബോർഡ് വിശദീകരണം ആവശ്യപ്പെട്ടു.ക്ഷേത്രങ്ങളിലും ക്ഷേത്ര പരിസരങ്ങളിലും രാഷ്ട്രീയ- ജാതി- മത സംഘടനകളുടെ ചിഹ്നങ്ങളോ കൊടികളോ പ്രദർശിപ്പിക്കാൻ പാടില്ല എന്ന ബഹു. ഹൈക്കോടതിയുടെ ഉത്തരവ് നിലനിൽക്കുന്നുണ്ട്. ഇത് നടപ്പിലാക്കുന്നതിന് തിരുവിതാംകൂർ ദേവസ്വം ബോർഡ് ബാധ്യസ്ഥമാണ്. ഈ സാഹചര്യത്തിലും ചില മത സംഘടനകളുടെ ശാഖാ പരിശീലനം ഉൾപ്പെടെയുള്ള പ്രവർത്തികൾ ചില ദേവസ്വം ക്ഷേത്രങ്ങളിൽ നടക്കുന്നതായി ശ്രദ്ധയിൽപ്പെട്ടിട്ടുണ്ട്. ഇത്തരം കാര്യങ്ങൾ യാതൊരു കാരണവശാലും ക്ഷേത്രങ്ങളിലോ ക്ഷേത്ര പരിസരങ്ങളിലോ അനുവദിക്കില്ല. ഇത്തരം സംഭവങ്ങളിൽ വിട്ടുവീഴ്ചയില്ലാത്ത സമീപനമാണ് തിരുവിതാംകൂർ ദേവസ്വം ബോർഡിനുള്ളത് ക്ഷേത്രവും ക്ഷേത്ര പരിസരവും ഭക്തജനങ്ങൾക്ക് പ്രാർത്ഥിക്കുന്നതിനും ആരാധന നടത്തുന്നതിനും ഉള്ള ഇടങ്ങളാണ്. ബഹുമാനപ്പെട്ട ഹൈക്കോടതിയുടെ വിധി പാലിക്കുവാൻ ക്ഷേത്ര ഉപദേശക സമിതികളും ക്ഷേത്ര ജീവനക്കാരും ജാഗ്രത പുലർത്തണമെന്ന് തിരുവിതാംകൂർ ദേവസ്വം ബോർഡ് അറിയിച്ചു.