വി ഐ പി റോഡിലുണ്ടായ വാഹനാപകടത്തിൽ മൂന്ന് പേർ മരിച്ച സംഭവത്തിന് പിന്നാലെ റോഡിലെ സുരക്ഷാ ക്രമീകരണങ്ങൾ വിലയിരുത്തി പൊലീസ് സംഘം.റൂറൽ ജില്ലാ പൊലീസ് മേധാവി കെ എസ് സുദർശൻ, ആലുവ ഡി വൈ എസ് പി ബൈജു പൗലോസ് എന്നിവരുടെ നേതൃത്വത്തിൽ മോട്ടോർ വാഹന വകുപ്പ്, സിയാൽ അധികൃതർ എന്നിവരുമായി ചേർന്നായിരുന്നു പരിശോധന.വിമാനത്താവളം മുതൽ അത്താണി സിഗ്നൽ കവല വരെയുള്ള റോഡിലെ അപകടസാധ്യതയുള്ള വളവുകളും യു-ടേണുകളും പരിശോധിച്ചു. നിലവിലെ മണിക്കൂറിൽ 60 കിലോമീറ്റർ വേഗപരിധി കുറയ്ക്കുന്ന കാര്യം പരിഗണിക്കണമെന്നും അപകടസാധ്യതയുള്ള ഭാഗങ്ങളിൽ ശാസ്ത്രീയമായ രീതിയിൽ റംബിൾ സ്ട്രിപ്പുകളും അത്യാധുനിക വേഗനിയന്ത്രണ സംവിധാനങ്ങളും ക്യാമറകളും സ്ഥാപിക്കണമെന്നും നിർദേശം നൽകി.റോഡരികിലെ പാർക്കിങ് ഒഴിവാക്കാനും അറ്റകുറ്റപ്പണികൾ യഥാസമയം പൂർത്തിയാക്കാനും സിയാൽ അധികൃതരോട് ആവശ്യപ്പെട്ടു. റോഡിന്റെ നിർമാണനിലവാരം മികച്ചതാണെന്ന് വിലയിരുത്തിയ ഉദ്യോഗസ്ഥർ, അമിതവേഗം നിയന്ത്രിക്കുന്നതിനും അപകടങ്ങൾ കുറയ്ക്കുന്നതിനും അടിയന്തര നടപടികൾ സ്വീകരിക്കണമെന്ന് നിർദേശിച്ചു.