സാമൂഹ്യ മാധ്യമങ്ങളിലൂടെ സ്ത്രീകളെ അപകീര്ത്തിപ്പെടുത്തുന്നത് വര്ധിച്ചു വരുകയാണെന്നും ഇത്തരം പരാതികളില് കര്ശന നിലപാട് സ്വീകരിക്കുമെന്നും കേരള വനിതാ കമ്മിഷന് അംഗം അഡ്വ. പി. കുഞ്ഞായിഷ പറഞ്ഞു. കാസര്കോട് കളക്ടറേറ്റ് കോണ്ഫറന്സ് ഹാളില് നടത്തിയ ജില്ലാതല അദാലത്തിന് ശേഷം സംസാരിക്കുകയായിരുന്നു വനിതാ കമ്മിഷന് അംഗം.
തെരഞ്ഞെടുക്കപ്പെട്ട വനിതാ ജനപ്രതിനിധികളെയടക്കം സമൂഹമാധ്യമങ്ങളിലൂടെ അപമാനിക്കുന്നത് സംബന്ധിച്ച പരാതികള് വനിതാ കമ്മിഷന് മുന്പാകെ എത്തുന്നുണ്ട്.
കാസര്കോട് ജില്ലയില് നടത്തിയ അദാലത്തില് ഇത്തരത്തിലുള്ള രണ്ടു പരാതികള് ലഭിച്ചിട്ടുണ്ടെന്നും കമ്മിഷന് അംഗം പറഞ്ഞു.കാലാലയങ്ങളിലും സ്കൂളുകളിലും വിദ്യാര്ഥികള്ക്കായി നടത്തുന്ന കാമ്പയിനുകളിലും തദ്ദേശ സ്ഥാപനതലത്തിലെ ജാഗ്രതാ സമിതികളിലും ഗാര്ഹിക പീഡന നിയമം, സ്ത്രീധന നിരോധന നിയമം എന്നിവ സംബന്ധിച്ച അവബോധ ക്ലാസുകള് നടത്താറുണ്ട്.