കേരള സര്‍വകലാശാലയില്‍ ഗുരുതര വീഴ്ച. അധ്യാപകന്റെ കയ്യില്‍ നിന്ന് ഉത്തരക്കടലാസ് നഷ്ടപ്പെട്ടതിനെത്തുടര്‍ന്ന് വീണ്ടും പരീക്ഷയെഴുതാന്‍ 71 വിദ്യാര്‍ത്ഥികള്‍ക്ക് നിര്‍ദേശം നല്‍കി. എംബിഎ കോഴ്‌സ് പൂര്‍ത്തിയാക്കിയവര്‍ക്കാണ് ഈ ദുരവസ്ഥ. മൂന്നാം സെമസ്റ്റര്‍ പരീക്ഷയാണ് വീണ്ടും എഴുതേണ്ടത്. ഈ വിദ്യാര്‍ത്ഥികള്‍ നാലാം സെമസ്റ്റര്‍ പരീക്ഷയും എഴുതിയിരുന്നു. ഒരുപാട് കുട്ടികള്‍ വിദേശത്തും മറ്റ് സംസ്ഥാനങ്ങളിലുമുള്ളവരാണ്. ഏപ്രില്‍ 7ന് വീണ്ടും പരീക്ഷ എഴുതണമെന്ന ഇമെയിലാണ് വിദ്യാര്‍ത്ഥികള്‍ക്ക് കിട്ടിയത്. മൂന്നും നാലും സെമസ്റ്ററുകളുടെ ഫലം പ്രസിദ്ധീകരിച്ചിരുന്നില്ല. വരുന്ന വഴിയില്‍ ഉത്തരക്കടലാസ് കാണാതായി എന്നാണ് അധ്യാപകന്‍ പറയുന്നത്. വിഷയം സിന്‍ഡിക്കേറ്റ് പരിശോധിച്ചു. കേരള സർവ്വകലാശാല ഉത്തരക്കടലാസ് കാണാതായ സംഭവത്തിൽ വൈസ് ചാൻസിലർ അടിയന്തര യോഗം വിളിച്ചിട്ടുണ്ട്.