യൂത്ത് കോണ്ഗ്രസിന്റെ പുതിയ സംസ്ഥാന നേതൃത്വം ഇന്ന് ചുമതലയേല്ക്കും.സംസ്ഥാന പ്രസിഡൻ്റായി ഒ ജെ ജനീഷും വര്ക്കിങ് പ്രസിഡന്റായി ബിനു ചുള്ളിയിലും സ്ഥാനമേല്ക്കും. രാവിലെ 11 മണിക്ക് ഇന്ദിരാഭവനിലാണ് ചുമതലയേല്ക്കുന്നത്. കെപിസിസി പ്രസിഡന്റ് സണ്ണി ജോസഫ്, യൂത്ത് കോണ്ഗ്രസ് ദേശീയ അധ്യക്ഷൻ ഉദയ്ഭാനു ചിബ് തുടങ്ങിയവര് പങ്കെടുക്കും. ലൈംഗിക ആരോപണത്തെ തുടര്ന്ന് രാഹുല് മാങ്കൂട്ടത്തില് രാജിവച്ചതിനെ തടർന്നാണ് വൈസ് പ്രസിഡന്റായിരുന്ന ജനീഷിനെ അധ്യക്ഷനാക്കിയത്. അബിൻ വര്ക്കിയെ പ്രസിഡന്റാക്കത്തതില് ഐ ഗ്രൂപ്പ് കടുത്ത അമര്ഷത്തിലാണ്. അമ്മയുടെ സഞ്ചയന ചടങ്ങായതിനാല് രമേശ് ചെന്നിത്തലയും കൊല്ലത്ത് ആര്എസ്പിയുടെ അടക്കം പരിപാടികളിലായതിനാല് പ്രതിപക്ഷ നേതാവും ചുമതലയേല്ക്കല് ചടങ്ങില് പങ്കെടുക്കില്ല. ഉച്ചയ്ക്ക് ശേഷം ചേരുന്ന സംസ്ഥാന ഭാരവാഹികളുടെയും ജില്ലാ പ്രസിഡന്റുമാരുടെയും യോഗത്തിലും യൂത്ത് കോണ്ഗ്രസ് ദേശീയ അധ്യക്ഷൻ പങ്കെടുക്കും. തദ്ദേശ തെരഞ്ഞെടുപ്പ് പ്രവര്ത്തനത്തെക്കുറിച്ച് ആലോചിക്കും.