കൊച്ചി പള്ളുരുത്തി സെന്റ് റീത്താസ് സ്കൂളില് ശിരോവസ്ത്ര വിലക്ക് നേരിട്ട വിദ്യാര്ത്ഥിനിയെ പുതിയ സ്കൂളിലേക്ക് മാറ്റി. പള്ളുരുത്തി ഡോണ് പബ്ലിക് സ്കൂളിലേക്കാണ് മാറ്റിയത്. അന്തസ്സ് ഉയര്ത്തിപ്പിടിച്ച് മകള് പുതിയ സ്കൂളിലേക്ക് പോകുന്നു എന്ന് കുട്ടിയുടെ പിതാവ് അനസ് നൈന അറിയിച്ചു. മക്കള് അവരുടെ ഡിഗ്നിറ്റി ഉയര്ത്തിപിടിച്ചു തന്നെ, അവളുടെ തലയിലെ മുക്കാല് മീറ്റര് തുണി കണ്ടാല് ഒപ്പമുള്ള ഒരു കുട്ടിയും പേടിക്കില്ല എന്ന് ഉറപ്പുള്ള കലാലയത്തിലേക്ക് പോകുകയാണ്.പ്രതിസന്ധി ഘട്ടത്തില് ആള്ക്കൂട്ടങ്ങളുടെയോ സംഘടിത ശക്തിയുടെയോ പിന്ബലമില്ലാത്ത ഒരു സാധാരണക്കാരനായ തനിക്കൊപ്പം നിന്ന മുഴുവന് ആളുകള്ക്കും നന്ദി. വൈവിധ്യങ്ങളുടെ കളറുള്ള പുതു ലോക ക്രമത്തിലേക്ക് നമ്മുടെ മക്കള് യാത്ര തുടരട്ടെ എന്നാണ് അനസ് നൈനയുടെ പ്രതികരണം.