സന്തോഷ്ട്രോഫി ഫുട്ബാള് ടൂർണമെന്റിന്റെ ഫൈനല് റൗണ്ടിലെ ഗ്രൂപ്പ് ബിയില് കേരളം ഇന്ന് തങ്ങളുടെ രണ്ടാം മത്സരത്തില് റെയില്വേയ്സിനെ നേരിടും.രാവിലെ 9 മണിക്ക് സിലാപത്തർ സ്റ്റേഡിയത്തിലാണ് മത്സരം.ആദ്യ മത്സരത്തില് പഞ്ചാബിനെ 3-1ന് തോല്പ്പിച്ചതിന്റെ ആവേശത്തിലാണ് ഇന്ന് കേരളം ബൂട്ടുകെട്ടുന്നത്. റെയില്വേയ്സ് ആദ്യ കളിയില് സർവീസസിനോട് 1-1ന് സമനിലയില് പിരിയുകയായിരുന്നു. ഗ്രൂപ്പ് ബിയില് മൂന്ന് പോയിന്റുമായി കേരളമാണ് ഒന്നാമത്. ഗ്രൂപ്പിലെ മറ്റൊരു മത്സരത്തില് ഒഡിഷയെ 1-0ത്തിന് തോല്പ്പിച്ച മേഘാലയയാണ് ഇത്രതന്നെ പോയിന്റുമായി രണ്ടാം സ്ഥാനത്ത്. റെയില്വേയ്സ് ഒരു പോയിന്റുമായി മൂന്നാമതാണ്.പഞ്ചാബിനെതിരെ ആദ്യ കുതിയില് ഒരു ഗോളിന് പിന്നില് നിന്ന ശേഷമാണ് കേരളം തിരിച്ചടിച്ച് ജയിച്ചത്. ഇരട്ട ഗോളുകള് നേടിയ മുഹമ്മദ് അജ്സലും ഒരു ഗോളടിച്ച എം.മനോജുമാണ് വിജയം നല്കിയത്. മുഹമ്മദ് സിനാൻ,ഷിജിൻ,വിഗ്നേഷ് തുടങ്ങിയവരുടെ പ്രകടനവും കേരളത്തിന് കരുത്ത് നല്കുന്നു.റെയില്വേയ്സിനെതിരെയും വിജയം തുടരാനായാല് നോക്കൗട്ട് ഘട്ടത്തിലേക്ക് സമ്മർദ്ദം കൂടാതെ കടക്കാമെന്ന പ്രതീക്ഷയിലാണ് കേരള ടീം ചീഫ് കോച്ച് ഷെഫീഖ് ഹസനും അസിസ്റ്റന്റ് കോച്ച് എബിൻ റോസും.