കാർട്ടൂണിസ്റ്റും പ്രസാധാകനുമായ അനിൽ വേഗ ഫേസ് ബുക്കിലെഴുതിയ കുറിപ്പ് ശ്രദ്ധേയമാകുന്നു. അദ്ദേഹത്തിൻ്റെ പബ്ളിക്കേഷനായ ഡോൺ ബുക്സ് വഴി 2017 ജനുവരിയിൽ പ്രസിദ്ധീകരിച്ച പുസ്തകമാണ് മമ്മൂട്ടി അറിയാത്ത കാര്യങ്ങൾ, ജീ കൃഷ്ണൻ മാലമാണ് രചയിതാവ്. കഴിഞ്ഞ 9 വർഷത്തിനു ശേഷമാണ് കൃഷ്ണന് ഈ പുസ്തകത്തിൻ്റെ കോപ്പി മമ്മൂട്ടിക്ക് കൊടുക്കാനായതത്രേ..
പോസ്റ്റിൻ്റെ പൂർണ്ണരൂപം വായിക്കാം.
ഇതൊരു വെറും ഫോട്ടോയല്ല, സുഹൃത്തുക്കളേ. ഒൻപത് നീണ്ട വർഷങ്ങളുടെ കാത്തിരിപ്പിൻ്റെയും, ആരുമറിയാതെ പോയ ഒരു സ്വപ്നത്തിൻ്റെയും, പിന്നെ വലിയൊരു മനുഷ്യൻ്റെ തെറ്റിദ്ധാരണകൾ തിരുത്തുന്നതിൻ്റെയും കണ്ണീരുപ്പുള്ള കഥയാണിത്. ഈ ചിരിക്കുപിന്നിൽ മഞ്ഞുരുകുന്ന ഒരു ഹൃദയത്തിൻ്റെ കഥയുണ്ട്.
ഒരു കാലം… സിനിമാക്കാർക്ക് നാന ഒരു വികാരമായിരുന്ന, ഒരു ആർക്കും തടയാനാവാത്ത ശക്തിയായിരുന്ന കാലം. നാനയുടെ പേജുകളിൽ ഒരു വരി അച്ചടിച്ചു കാണാൻ സൂപ്പർസ്റ്റാറുകൾ പോലും ആഗ്രഹിച്ച, പുതുമുഖങ്ങൾ ഒരു സ്നാപ്പിനായി കാത്തുനിന്ന കാലം. വിമലാ രാജകൃഷ്ണൻ എന്ന കുമാരിയമ്മയുടെ വാക്കിന് മലയാള സിനിമയിൽ കൽപ്പടയുടേക്കാൾ വിലയുണ്ടായിരുന്ന ആ പ്രതാപകാലത്താണ് ഞാനാ പേര് കേൾക്കുന്നത്: ജി. കൃഷ്ണൻ മാലം.
ഒരു പാവം, ആർക്കും ഒരപകടവും വരുത്താത്ത, സമാധാനപ്രിയനായ ഒരു മനുഷ്യൻ. പ്രശസ്ത സിനിമാ നിരൂപകൻ എ. ചന്ദ്രശേഖർ എന്നോട് അദ്ദേഹത്തിൻ്റെ നാനയിലെ പംക്തിയെക്കുറിച്ച് പറഞ്ഞപ്പോൾ എനിക്കൊട്ടും സുഖകരമായി തോന്നിയില്ല. പേര് അതായിരുന്നു— “മമ്മൂട്ടി അറിയാത്ത കാര്യങ്ങൾ.”
ചിന്തിച്ചു നോക്കൂ, പ്രിയപ്പെട്ട മമ്മൂക്ക… മമ്മൂട്ടി അറിയാത്ത എന്ത് കാര്യമാണ് കൃഷ്ണേട്ടന് എഴുതാനുള്ളത്? എൻ്റെ വാക്ക് പൊന്നായി, ഈ പുസ്തകം പ്രസിദ്ധീകരിക്കുന്നതിന് തൊട്ടുമുമ്പ് ചില തെറ്റിദ്ധാരണകളുടെ പുറത്ത് മമ്മൂക്ക കൃഷ്ണേട്ടനെ കാണാൻ വിസമ്മതിച്ചു. ആ പുസ്തകം പുറത്തിറക്കാൻ ആ മനുഷ്യൻ സഹിച്ച കഷ്ടപ്പാടുകൾ എനിക്കറിയാം. നാനയിലെ പഴയ ഫോട്ടോകൾ സംഘടിപ്പിച്ചു തന്നു. വിമലാ രാജകൃഷ്ണൻ അവതാരിക എഴുതി. എൻ്റെ കരിയറിൽ ഏറ്റവും കൂടുതൽ സമയമെടുത്താണ് ഞാൻ ഈ പുസ്തകം ഡിസൈൻ ചെയ്തത്.
പക്ഷേ, ആ പേര് ഒരു ‘അറം’ പറ്റിയപോലെയായി. മമ്മൂക്ക ആ പുസ്തകം കാണാൻ പോലും തയ്യാറായില്ല. അദ്ദേഹത്തെ ആ മനുഷ്യൻ്റെ മുന്നിൽ എത്തിക്കാനുള്ള എല്ലാ ശ്രമങ്ങളും പരാജയപ്പെട്ടു. കൃഷ്ണേട്ടൻ്റെ ആ വലിയ സ്വപ്നം പൊടിപിടിച്ച്, മാറാലപിടിച്ച് ഗോഡൌണിൽ കെട്ടിക്കിടന്നു.
ഏറ്റവും രസകരമായതും സങ്കടകരവുമായ കാര്യം, ഈ പംക്തി നാനയിൽ തുടങ്ങാൻ ഏറ്റവും കൂടുതൽ താൽപ്പര്യമെടുത്തത് സാക്ഷാൽ മമ്മൂക്ക തന്നെയായിരുന്നു! എന്നാൽ, ഷീലാമ്മ പറഞ്ഞതടക്കമുള്ള പല ലക്കങ്ങളിലെയും ചില പരാമർശങ്ങൾ അദ്ദേഹത്തെ ചൊടിപ്പിച്ചു. ഒരു കാലത്ത് മമ്മൂക്കയെക്കുറിച്ച് എഴുതാൻ അനുവാദം നൽകിയ അതേ നാവ്, പിന്നെ ആ മനുഷ്യനെ കാണാൻ പോലും കൂട്ടാക്കിയില്ല. ഒരു പുസ്തകം, അതും ഒഴിവാക്കാവുന്ന ഭാഗങ്ങളെല്ലാം ഒഴിവാക്കി പ്രസിദ്ധീകരിച്ചിട്ടും, ആ മനുഷ്യൻ്റെ ആഗ്രഹം നിറവേറാതെ പോയി.
വർഷങ്ങൾ പലതും കടന്നുപോയി. ഒൻപത് വർഷം! ആ ഒൻപത് വർഷവും കൃഷ്ണേട്ടൻ്റെ മനസ്സ് മമ്മൂക്കയ്ക്കു മുന്നിലായിരുന്നു. എന്നെങ്കിലും മമ്മൂക്ക വിളിക്കുമെന്നും ആ പുസ്തകം കൈമാറാമെന്നുമുള്ള പ്രതീക്ഷയിൽ, പൊടിപോലും പറ്റാതെ, പൊന്നുപോലെ സൂക്ഷിച്ച രതീഷ് രവി വരച്ച കാരിക്കേച്ചർ കവറുള്ള പുസ്തകമാണിത്. ആർട്ടിസ്റ്റ് രതീഷ് രവി എത്ര മനോഹരമായാണ് മമ്മൂക്കയെ വരച്ചത്! കൃഷ്ണേട്ടൻ്റെ നെഞ്ചിലെ കനൽ പോലെ, ആ ഒരൊറ്റ കോപ്പി അദ്ദേഹം കാത്തുസൂക്ഷിച്ചു.
ഒടുവിൽ… ആ നിമിഷമെത്തി. നീണ്ട 9 വർഷങ്ങൾക്ക് ശേഷം കൃഷ്ണേട്ടൻ മമ്മൂക്കയെ കണ്ട് പുസ്തകം കൈമാറി. നിങ്ങൾ ഈ ഫോട്ടോ നോക്കൂ. മമ്മൂക്ക വളരെ സന്തോഷത്തോടെ ആ പുസ്തകം മറച്ചുനോക്കുമ്പോൾ, അടുത്തുനിൽക്കുന്ന കൃഷ്ണേട്ടൻ്റെ മുഖം നോക്കൂ. ആ മുഖത്തെ ആ സന്തോഷം! ആ ഹൃദയത്തുടിപ്പ് എനിക്ക് അറിയാമായിരുന്നു. ഈ നിമിഷം എത്രയേറെ ആ മനുഷ്യൻ ആഗ്രഹിച്ചിരുന്നു!
എനിക്ക് ഏറെ പ്രിയപ്പെട്ട, പാവമൊരു മനുഷ്യൻ. പലപ്പോഴും കോട്ടയത്തെ പൊരിവെയിലിലൂടെ ആ പാവം മനുഷ്യൻ നടന്നുപോകുന്നത് കാണുമ്പോഴെല്ലാം എൻ്റെ മനസ്സ് വിങ്ങുമായിരുന്നു. അപ്പോഴെല്ലാം ആ മാറാലപിടിച്ച പുസ്തകത്തെക്കുറിച്ചാണ് ഞാനോർത്തത്.
ശ്രീ. മമ്മൂട്ടി മഹാനടനാണെന്ന് ആർക്കും സംശയമില്ല. അദ്ദേഹം രോഗബാധിതനായപ്പോൾ ഞാനും വിഷമിച്ചു. പക്ഷേ, നമ്മൾ മറക്കരുത്—ഇവരെപ്പോലെയുള്ളവരെ സൂപ്പർസ്റ്റാർഡത്തിലേക്ക് ഉയർത്തുന്നതിൽ ഈ പാവം മനുഷ്യൻ്റെ തൂലികയ്ക്കും വലിയൊരു പങ്കുണ്ട്. ഒരുപക്ഷേ, കാലം അദ്ദേഹത്തിന് പുതിയ തിരിച്ചറിവുകൾ നൽകിയിട്ടുണ്ടാവാം. അങ്ങനെയാവട്ടെ എന്ന് പ്രാർത്ഥിക്കുന്നു.
എന്തായാലും, കൃഷ്ണേട്ടന് സമാധാനമായല്ലോ, എനിക്കത് മാത്രം മതി. ഒൻപത് വർഷത്തെ ആ വലിയ സങ്കടം മാറിയല്ലോ.
നന്ദി, പ്രിയപ്പെട്ട മമ്മൂക്കാ… ഈ ഒരു നിമിഷം ആ പാവം മനുഷ്യന് നൽകിയ സന്തോഷത്തിന്. ഇതൊരു വെറും ഫോട്ടോയല്ല, ഒരു ജന്മസാഫല്യത്തിൻ്റെ ചിത്രമാണ്.