തിരുവനന്തപുരം: പട്ടികജാതി വികസന വകുപ്പിന് കീഴിൽ പൂച്ചെടിവിളയിൽ പ്രവർത്തിക്കുന്ന പോസ്റ്റ് മെട്രിക് ഗേൾസ് ഹോസ്റ്റൽ പട്ടികജാതി-പട്ടികവർഗ്ഗ പിന്നാക്ക വികസന വകുപ്പ് മന്ത്രി കെ.എ. തുളസി സന്ദർശിച്ചു. ഹോസ്റ്റലിലെ അടിസ്ഥാന സൗകര്യങ്ങളും അന്തേവാസികളായ വിദ്യാർത്ഥിനികൾ നേരിടുന്ന വിവിധ പ്രശ്നങ്ങളും നേരിട്ട് മനസ്സിലാക്കുന്നതിനായിരുന്നു മന്ത്രിയുടെ സന്ദർശനം.സന്ദർശന വേളയിൽ ഹോസ്റ്റലിലെ പ്രായോഗിക ബുദ്ധിമുട്ടുകൾ വിദ്യാർത്ഥിനികൾ മന്ത്രിയുടെ ശ്രദ്ധയിൽപ്പെടുത്തി. ഹോസ്റ്റലിലെ ടോയ്ലറ്റുകൾ നവീകരിക്കണമെന്നും, നിലവിലുള്ള ഹോസ്റ്റൽ സമയക്രമം (Timing) വിദ്യാർത്ഥിനികൾക്ക് ബുദ്ധിമുട്ട് ഉണ്ടാക്കുന്നതാണെന്നും, ആവശ്യാനുസരണം സമയം നീട്ടി നൽകണമെന്നും അവർ ആവശ്യപ്പെട്ടു. ഹോസ്റ്റലിൽ നിലവിൽ നൽകുന്ന ഭക്ഷണത്തിന്റെ കാര്യത്തിൽ ഗുണപരമായ മാറ്റങ്ങൾ വരുത്തണമെന്ന് അന്തേവാസികൾ ആവശ്യപ്പെട്ടു. പ്ലസ് വൺ മുതൽ വിവിധ ഉന്നത കോഴ്സുകളിൽ പഠിക്കുന്ന മുന്നൂറോളം വിദ്യാർത്ഥിനികൾക്ക് താമസിക്കാൻ സൗകര്യമുള്ള ഈ ഹോസ്റ്റലിൽ നിലവിൽ ഇരുന്നൂറോളം പേരാണ് താമസിക്കുന്നത്. വിദ്യാർത്ഥിനികളുടെ പരാതികൾ വളരെ അനുഭാവപൂർവ്വം കേട്ട മന്ത്രി, അടിസ്ഥാന പ്രശ്നങ്ങൾ പരിഹരിക്കുന്നതിനും സമയക്രമത്തിൽ വരുത്തേണ്ട പ്രായോഗികമായ മാറ്റങ്ങൾ പരിശോധിക്കുമെന്നും ഉറപ്പുനൽകി.