നീരേറ്റുപുറം പമ്പ വാട്ടർ സ്റ്റേഡിയത്തിൽ 69-ാമത് പമ്പ ജലമേള സെപ്റ്റംബർ 6-ന് ഉച്ചയ്ക്ക് 2.30-ന് നടത്താൻ ധാരണയായി. വള്ളംകളിയുമായി ബന്ധപ്പെട്ട പ്രശ്നങ്ങൾ റെജി ചെറിയാൻ എം.എൽ.എയുടെ നേതൃത്വത്തിൽ രണ്ട് വള്ളംകളി ഭാരവാഹികളുമായി നടത്തിയ ചർച്ചയിലാണ് പരിഹരിച്ചത്. സംഘടന രണ്ടായി പിരിയുകയും കോടതി വിധികളുടെതുമൂലം കുറച്ചുനാളായി രണ്ട് വള്ളംകളികൾ നടത്തുകയും ചെയ്യുകയായിരുന്നു. ഇതുമായി ബന്ധപ്പെട്ട് രണ്ട് സംഘാടകരും കോടതിയെ സമീപിച്ചെങ്കിലും, പത്തനംതിട്ട ജില്ലാ ഭരണകൂടം ഉചിതമായ തീരുമാനം എടുത്തു നടപ്പാക്കാൻ കോടതി നിർദ്ദേശിക്കുകയാണുണ്ടായത്. തുടർന്ന് രണ്ട് ക്ലബ് ഭാരവാഹികളെയും വിളിച്ചു ചർച്ച നടത്തിയതിന്റെ പശ്ചാത്തലത്തിൽ, ഓഗസ്റ്റ് 31-ന് ജനകീയ ട്രോഫി വള്ളംകളിയും സെപ്റ്റംബർ 5-ന് ഉത്രാടം തിരുനാൾ വള്ളംകളിയും നടത്തുവാൻ കളക്ടർ ഉത്തരവിറക്കി.ഈ ചർച്ചകളുടെ അടിസ്ഥാനത്തിലാണ് ഒന്നിച്ച് സെപ്തംബർ 6 ന് വള്ളംകളി നടത്തുവാൻ അന്തിമ ധാരണയായത്.