ചിറയിന്‍കീഴ് സംഘര്‍ഷവുമായി ബന്ധപ്പെട്ട് കെ.പി.സി.സി സസ്‌പെന്‍ഡ് ചെയ്ത പാളയം പ്രദീപിനെ മുന്‍കാല പ്രാബല്യത്തോടെ ഔദ്യോഗിക സ്റ്റാഫില്‍ ഉള്‍പ്പെടുത്താനുള്ള രമ്യ ഹരിദാസ് എം.എല്‍.എയുടെ നീക്കത്തിന് തിരിച്ചടി.മേയ് 21 മുതല്‍ പ്രാബല്യമുണ്ടെന്ന തരത്തില്‍ നല്‍കിയ അപേക്ഷ ചട്ടവിരുദ്ധമായതിനാല്‍ സ്വീകരിക്കാനാകില്ലെന്ന് നിയമസഭാ സെക്രട്ടറി അറിയിച്ചു. ഇതോടെ കത്ത് മടക്കി നല്‍കുകയും പുതിയ തീയതിയില്‍ തത്സമയ പ്രാബല്യത്തോടെ അപേക്ഷ നല്‍കാന്‍ നിര്‍ദേശിക്കുകയും ചെയ്തു.പാളയം പ്രദീപിനെ തന്റെ അഡീഷണല്‍ പി.എയായി മേയ് 21, 2026 മുതല്‍ മുന്‍കാല പ്രാബല്യത്തോടെ നിയമിക്കണമെന്നായിരുന്നു രമ്യ ഹരിദാസിന്റെ ആവശ്യം. പ്രദീപ് അന്നുമുതല്‍ തന്റെ കൂടെ പ്രവര്‍ത്തിക്കുന്നുണ്ടെന്നും അതിനാലാണ് ആ തീയതി മുതല്‍ നിയമനം നല്‍കേണ്ടതെന്നുമാണ് എം.എല്‍.എ ചൂണ്ടിക്കാട്ടിയിരുന്നത്.സെപ്റ്റംബര്‍ നാലാം തീയതി രേഖപ്പെടുത്തിയ കത്താണ് ഇന്ന് നിയമസഭാ സെക്രട്ടറിയുടെ ഓഫീസില്‍ സമര്‍പ്പിച്ചത്. പാളയം പ്രദീപിനൊപ്പം കോഴിക്കോട് സ്വദേശി കുഞ്ഞഹമ്മദിനെയും മുന്‍കാല പ്രാബല്യത്തോടെ സ്റ്റാഫില്‍ ഉള്‍പ്പെടുത്തണമെന്ന ആവശ്യവും കത്തിലുണ്ടായിരുന്നു. എന്നാല്‍ പഴയ തീയതി രേഖപ്പെടുത്തി നിയമനനടപടികളിലേക്ക് കടക്കാനാകില്ലെന്ന് നിയമസഭാ സെക്രട്ടേറിയറ്റ് വ്യക്തമാക്കി. ഇതോടെയാണ് കത്ത് മടക്കി നല്‍കിയത്.