എക്സൈസ് കമ്മിഷണർ സീറാം സാംബശിവറാവുവിനെ മാറ്റി.അഡീ.കമ്മിഷണർക്ക് താൽക്കാലിക ചുമതല നൽകി.സർക്കാരും മന്ത്രിയും അറിയാതെ ബാർ ലൈസൻസ് നൽകിയെന്ന വിവാദം കത്തുന്നതിനിടെ ആണീ തീരുമാനം. എക്സൈസ് കമ്മിഷണറുടെ നടപടിയിൽ മന്ത്രി എം. ലിജു ശക്തമായ അതൃപ്ത‌ി പ്രകടിപ്പിച്ചിരുന്നു.ഇതിനു പിന്നാലെയാണ് കമ്മിഷണറെ മാറ്റിയിരിക്കുന്നത്. മദ്യനയം വരുന്നതിനു മുൻപ് ഒരു ബാർ ലൈസൻസും അനുവദിക്കേണ്ടതില്ലെന്ന് ഓഗസ്‌റ്റിൽ സർക്കാർ നിർദേശം നൽകിയിരുന്നു . എന്നാൽ മൂന്ന് ബീയർ, വൈൻ പാർലറുകൾക്കു ലൈസൻസ് പുതുക്കി നൽകുകയും കൊച്ചി വിമാനത്താവളത്തിൽ 2 ലൗഞ്ച് ബാർ ലൈസൻസ് അനുവദിച്ചതും വൻ വിവാദമായിരുന്നു. മദ്യനയം വരുന്നതിനു മുൻപ് മന്ത്രി അറിയാതെയാണ് ഈ നടപടികളെന്നു ചൂണ്ടിക്കാട്ടി രണ്ട് എക്സൈസ് ഉദ്യോഗസ്ഥരെ സസ്പെൻഡ് ചെയ്‌തിരുന്നു. വിഷയത്തിൽ സീറാം സാംബശിവറാവു നൽകിയ റിപ്പോർട്ട് മന്ത്രി ലിജു തള്ളിയിരുന്നു. ഇന്നലെ മന്ത്രി വിളിച്ച എക്സൈസ് ഉദ്യോഗസ്‌ഥരുടെ യോഗത്തിൽ സാംബശിവറാവു വന്നിരുന്നില്ല.