പ്രധാനമന്ത്രി നരേന്ദ്ര മോദിയുടെ സത്യപ്രതിജ്ഞ ചടങ്ങില്‍ പങ്കെടുക്കാൻ നേപ്പാള്‍ പ്രധാനമന്ത്രി പുഷ്പ കമല്‍ ദഹലും ശ്രീലങ്കൻ പ്രസിഡന്‍റ് റനില്‍ വിക്രമസിംഗെയും നാളെ രാജ്യ തലസ്ഥാനത്ത് എത്തും
ലോക്‌സഭാ തെരഞ്ഞെടുപ്പിലെ എൻ‌ഡിഎ സഖ്യത്തിന്‍റെ വിജയത്തെ നേപ്പാള്‍ പ്രധാനമന്ത്രി അഭിനന്ദിച്ചിരുന്നു. ഇതിനു പിന്നാലെ ബുധനാഴ്ച വൈകുന്നേരം പ്രധാനമന്ത്രി മോദി, പുഷ്പ കമാല്‍ ദഹലിനെ ടെലിഫോണില്‍ വിളിക്കുകയും സത്യപ്രതിജ്ഞ ചടങ്ങിലേയ്ക്ക് ക്ഷണിക്കുകയുമായിരുന്നു.
മോദിയുടെ ക്ഷണം സ്വീകരിച്ച പുഷ്പ കമാല്‍ ചടങ്ങില്‍ പങ്കെടുക്കുമെന്ന് അറിയിച്ചു. ഇക്കാര്യത്തില്‍ ഉടൻ ഔദ്യോഗിക അറിയിപ്പുണ്ടാകുമെന്ന് അദ്ദേഹത്തിന്‍റെ ഓഫീസ് അറിയിച്ചു.
തെരഞ്ഞെടുപ്പ് വിജയത്തിന് പിന്നാലെ റനില്‍ വിക്രമസിംഗെയും മോദിയെ ഫോണില്‍ വിളിച്ച്‌ അഭിനന്ദനം അറിയിച്ചിരുന്നു. തുടർന്നാണ് മോദി റനില്‍ വിക്രമസിംഗെയും ചടങ്ങിലേയ്ക്ക് ക്ഷണിച്ചത്.
പ്രധാനമന്ത്രി മോദിയുടെ സത്യപ്രതിജ്ഞാ ചടങ്ങില്‍ പങ്കെടുക്കാൻ ബംഗ്ലാദേശ് പ്രധാനമന്ത്രി ഷെയ്ഖ് ഹസീന ഇന്ന് ധാക്കയില്‍ നിന്ന് പുറപ്പെടും.