പ്രതിപക്ഷ നേതാവ് വി.ഡി. സതീശൻ തൃശൂരിലെ പ്രബുദ്ധരായ വോട്ടർമാരെ നിരന്തരമായി അവഹേളിക്കുകയാണന്ന് വി.മുരളീധരൻതൃശൂർ പൂരം കലക്കിയതിനാലാണ് സുരേഷ് ഗോപിയെ ജനങ്ങള്‍ വിജയിപ്പിച്ചത് എന്നാണ് പ്രതിപക്ഷ നേതാവ് പറയുന്നത്. സതീശന്റെ അവഹേളനം ബിജെപിയോടല്ല ജനങ്ങളോടാണെന്ന് മുരളീധരൻ തൃശൂരില്‍ മാദ്ധ്യമങ്ങളോട് പറഞ്ഞു.
പൂരം കലക്കിയത് കേരളത്തിലെ പൊലീസാണ്. ഇത് സംബന്ധിച്ച റിപ്പോർട്ട് പുറത്തു വിടാൻ സർക്കാർ തയ്യാറാവണം. മുഖ്യമന്ത്രിയും പ്രതിപക്ഷ നേതാവും തമ്മിലുള്ള ഗൂഢാലോചനയില്‍ ആർഎസ്‌എസിനെ വലിച്ചെഴയ്‌ക്കാനുള്ള ശ്രമമാണ് നടക്കുന്നത്. ഞാൻ സഹകാരണാത്മക പ്രതിപക്ഷനേതാവാണെന്ന് മുൻപേ വ്യക്തമാക്കിയ ആളാണ് വി.ഡി സതീശൻ. കേരളത്തില്‍ വന്ന് ഇവിടുത്തെ ക്ഷേത്രോത്സവം കലക്കാൻ ആർഎസ്‌എസ് നേതൃത്വം നല്‍കിയെന്ന സതീശന്റെ ആരോപണം സാമാന്യ ബുദ്ധിയുള്ളവർക്ക് അംഗീകരിക്കാൻ കഴിയില്ല. ആർഎസ്‌എസ് ചുമതലയുള്ളവർ പഞ്ചനക്ഷത്ര ഹോട്ടലില്‍ താമസിച്ചു എന്ന് പറയുന്നവർക്ക് അവരുടെ ജീവിതരീതി പരിചയമില്ലാത്തത് കൊണ്ടാണ്. ജവഹർലാല്‍ നെഹ്‌റു ആർഎസ്‌എസിനെ റിപ്പബ്ലിക് ഡേ പരേഡിന് ക്ഷണിച്ച കാര്യം സതീശൻ മറക്കരുതെന്നും വി. മുരളീധരൻ പറഞ്ഞു
സതീശൻ ഇപ്പോള്‍ പ്രകടിപ്പിക്കുന്നത് കപട ഹിന്ദുസ്നേഹമാണ്. ശബരിമലയില്‍ ആചാരലംഘനം നടന്നപ്പോള്‍ സതീശനും കൂട്ടരും എവിടെയായിരുന്നു. അന്ന് ആർഎസ്‌എസും ബിജെപിയും മാത്രമാണ് ഹിന്ദുക്കള്‍ക്കൊപ്പം ഉണ്ടായത്.അയോദ്ധ്യയിലെ പ്രാണ പ്രതിഷ്ഠയില്‍ പങ്കെടുക്കാത്തവരാണ് കോണ്‍ഗ്രസുകാർ. പല ആരോപണങ്ങളെയും വഴിതിരിച്ചു വിടാനുള്ള ശ്രമമാണ് കേരളത്തില്‍ നടക്കുന്നതെന്നും ബിജെപി നേതാവ് ചൂണ്ടിക്കാട്ടി.