തൃശൂർ കുഴൂരില് കാണാതായ ആറുവയസുകാരനെ കുളത്തില് മരിച്ചനിലയില് കണ്ടെത്തിയ സംഭവം കൊലപാതകമെന്ന് പോലിസ്. സംഭവത്തില് പ്രദേശവാസിയായ 20 കാരനെ പോലിസ് കസ്റ്റഡിയില് എടുത്തിട്ടുണ്ട്. കുഴൂര് സ്വര്ണപ്പള്ളം റോഡില് മഞ്ഞളി അജീഷിന്റെ മകന് ഏബലാണ് മരിച്ചത്. കുട്ടിയെ ഇന്നലെ വൈകുന്നേരം മുതലായിരുന്ന കാണാതായത്. നാട്ടുകാരുടെ സഹകരണത്തോടെ പോലിസ് നടത്തിയ തിരച്ചിലിലാണ് മൃതദേഹം കണ്ടെത്തിയത്.
ഇന്നലെ വൈകുന്നേരം ആറുമണിക്ക് ശേഷം കൂട്ടുകാര്ക്കൊപ്പം കളിക്കാന് പോകുന്നു എന്നുപറഞ്ഞാണ് ഏബല് വീട്ടില്നിന്ന് ഇറങ്ങിയത്. എന്നാല് നേരം ഏറെ വൈകിയിട്ടും കുട്ടി വീട്ടില് തിരികെ എത്താതെ വന്നതോടെയാണ് വീട്ടുകാര് പോലിസില് വിവരമറിയിച്ചത്. കളികഴിഞ്ഞ് ഏബല് നേരത്തേ വീട്ടിലേക്ക് മടങ്ങി എന്നായിരുന്നു കൂടെകളിച്ചിരുന്ന മറ്റ് കുട്ടികള് പോലിസിന് മൊഴി നല്കിയത്. കുട്ടിയുടെ വീടിനടുത്തുള്ള കെട്ടിടത്തിലെ സിസിടിവിയില് ഏബല് സ്ഥലത്തെ ഒരു യുവാവുമായി റോഡില് ഓടിക്കളിക്കുന്നതായുള്ള ദൃശ്യമായിരുന്നു അവസാനമായി ലഭിച്ചത്.