വടക്കഞ്ചേരി സാമൂഹികാരോഗ്യ കേന്ദ്രത്തില്‍ രോഗിക്ക് ഡ്രിപ്പിടാനായി കൈയില്‍ കുത്തിയ സൂചി അറ്റൻഡർ അഴിച്ചുമാറ്റിയെന്ന് പരാതി.സൂചി മാറ്റാനായി പ്ലാസ്റ്റർ മുറിച്ചപ്പോള്‍ കൈ മുറിയുകയും തുന്നലിടേണ്ടിവരികയും ചെയ്തു. കിഴക്കഞ്ചേരി നായരുകുന്ന് കല്യാണി (75) പനിബാധിച്ച്‌ കഴിഞ്ഞമാസം 19-ന് ചികിത്സയ്‌ക്കെത്തിയപ്പോഴായിരുന്നു സംഭവം.ഡ്രിപ്പ് കഴിഞ്ഞപ്പോള്‍ നഴ്സിനുപകരം അറ്റൻഡർ സൂചി മാറ്റുകയായിരുന്നെന്നാണ് പരാതി. കൈമുറിഞ്ഞത് ചോദ്യംചെയ്തപ്പോള്‍ തട്ടിക്കയറുകയായിരുന്നെന്നും കുടുംബാംഗങ്ങള്‍ ആരോപിച്ചു. വടക്കഞ്ചേരി സാമൂഹികാരോഗ്യ കേന്ദ്രം അധികൃതർ, ജില്ലാ മെഡിക്കല്‍ ഓഫീസർ, കളക്ടർ എന്നിവർക്ക് പരാതിനല്‍കിയിട്ടും നടപടിയുണ്ടായില്ലെന്ന് കുടുംബാംഗങ്ങള്‍ പറഞ്ഞു.സംഭവത്തില്‍ അന്വേഷണം നടത്തിയെന്നും അറ്റൻഡറാണ് സൂചി മാറ്റിയതെന്നും ആശുപത്രി സൂപ്രണ്ട് ഡോ. വി.ആർ. ജയന്ത് പറഞ്ഞു. ജില്ലാ മെഡിക്കല്‍ ഓഫീസർക്ക് റിപ്പോർട്ട് നല്‍കുമെന്നും അദ്ദേഹം പറഞ്ഞു.