മലപ്പുറത്ത് ഏതാനും താല്ക്കാലിക ബാച്ചുകള് അനുവദിച്ചതിനാല് മലബാറിലെ പ്ലസ് വണ് സീറ്റ് പ്രതിസന്ധി പരിഹരിക്കപ്പെടില്ലെന്ന് മുസ്ലിംലീഗ് സംസ്ഥാന ജനറല് സെക്രട്ടറി പി.എം.എ സലാം.
പാലക്കാട്ടും കോഴിക്കോടും ഒരു ബാച്ച് പോലും അനുവദിച്ചില്ല. മലപ്പുറത്തിന്റെ മാത്രം പ്രശ്നമായി ഇതിനെ കാണരുതെന്ന് മുസ്ലിംലീഗ് നേരത്തെ മുന്നറിയിപ്പ് നല്കിയിരുന്നു. എന്നാല് അതെല്ലാം അവഗണിച്ചാണ് മലപ്പുറത്ത് ഏതാനും താല്ക്കാലിക ബാച്ചുകള് അനുവദിച്ചത്. ഇത് വിഷയത്തില് നിന്ന് തടിത്തപ്പാനുള്ള സർക്കാറിന്റെ ശ്രമമാണ്’. സലാം പറഞ്ഞു.
മലപ്പുറത്ത് 2591 സീറ്റുകളുടെയും പാലക്കാട് 4383 സീറ്റുകളുടെയും കുറവുണ്ട്. മൊത്തത്തില് 73 ബാച്ചുകളെങ്കിലും അനുവദിച്ചാലേ ഈ പ്രശ്നം പരിഹരിക്കപ്പെടുകയുള്ളൂവെന്നും മുഴുവൻ വിദ്യാർത്ഥികള്ക്കും അവസരം നല്കാതെ പ്രശ്നം പരിഹരിക്കപ്പെടില്ലെന്നും പി.എം.എ സലാം കൂട്ടിച്ചേർത്തു.