ധാക്ക പ്രീമിയർ ലീഗ് മത്സരത്തിനിടെ ഹൃദയാഘാതം അനുഭവപ്പെട്ടതിനെ തുടർന്ന് ബംഗ്ലാദേശ് ക്രിക്കറ്റ് താരം തമീം ഇഖ്ബാലിനെ ആശുപത്രിയില്‍ പ്രവേശിപ്പിച്ചു. 35 കാരനായ ഓപ്പണർക്ക് മൈതാനത്ത് നെഞ്ചുവേദന അനുഭവപ്പെട്ടു, അടിയന്തര വൈദ്യസഹായവും നല്‍കി.
ധാക്കയിലേക്ക് കൊണ്ടുപോകാൻ ആദ്യം ഒരു ഹെലികോപ്റ്റർ ക്രമീകരിച്ചിരുന്നു, എന്നാല്‍ അദ്ദേഹത്തിന്റെ നില ഗുരുതരമായതിനാല്‍, പകരം ഫാസിലതുന്നെസ ആശുപത്രിയിലേക്ക് കൊണ്ടുപോയി. തമീമിന് ഗുരുതരമായ ഹൃദയാഘാതം സംഭവിച്ചതായി ബംഗ്ലാദേശ് ക്രിക്കറ്റ് ബോർഡിന്റെ ചീഫ് ഫിസിഷ്യൻ ഡോ. ദേബാഷിഷ് ചൗധരി പിന്നീട് സ്ഥിരീകരിച്ചു. അദ്ദേഹത്തെ സ്ഥിരപ്പെടുത്താനും സാധ്യമെങ്കില്‍ തുടർ ചികിത്സയ്ക്കായി ധാക്കയിലേക്ക് മാറ്റാനുമുള്ള ശ്രമങ്ങള്‍ തുടരുകയാണ്.ഈ വർഷം ആദ്യം അന്താരാഷ്ട്ര ക്രിക്കറ്റില്‍ നിന്ന് വിരമിച്ച തമീം, 70 ടെസ്റ്റുകളും 243 ഏകദിനങ്ങളും 78 ടി20 മത്സരങ്ങളും കളിച്ചിട്ടുള്ള ബംഗ്ലാദേശിലെ ഏറ്റവും മികച്ച ക്രിക്കറ്റ് കളിക്കാരില്‍ ഒരാളാണ്.