കൊച്ചി നോർത്ത് റെയില്വേ സ്റ്റേഷന് സമീപമുള്ള ഹോട്ടല്മുറിയില് ദമ്പതിമാർക്കൊപ്പം അവശനിലയില് കണ്ടെത്തിയ ഒന്നര വയസ്സുകാരനെ ശിശുക്ഷേമസമിതി ഏറ്റെടുത്തു. മാതാപിതാക്കള് ലഹരിക്ക് അടിമകളാണെന്നും കുട്ടി അവരുടെ പക്കല് സുരക്ഷിതനല്ലെന്നുമുള്ള റിപ്പോർട്ടുകളെത്തുടർന്നാണ് നടപടി. കുട്ടിയെ നിലവില് അമ്മയുടെ നാടായ പാലക്കാട്ടുള്ള ശിശുക്ഷേമസമിതിക്ക് കൈമാറി.തിങ്കളാഴ്ച വൈകീട്ടോടെയാണ് നോർത്ത് റെയില്വേ സ്റ്റേഷന് സമീപത്തെ ഹോട്ടലില് ദമ്പതിമാരെയും കുഞ്ഞിനെയും അവശനിലയില് കണ്ടെത്തിയത്. വിവരമറിഞ്ഞെത്തിയ പോലീസ് ലഹരി ഉപയോഗിച്ച നിലയിലായിരുന്ന ദമ്പതിമാരില് നിന്ന് കുട്ടിയെ മോചിപ്പിച്ച് ശിശുക്ഷേമസമിതിക്ക് കൈമാറുകയായിരുന്നു.