തിരുവനന്തപുരം മാര്‍ ഇവാനിയോസ് കോളജില്‍ സ്ഥാപിച്ച കെഎസ്യുവിന്റെ കൊടിമരവും തോരണങ്ങളും എസ്‌എഫ്‌ഐ പ്രവര്‍ത്തകര്‍ തകര്‍ത്തെന്ന് പരാതി. ഇന്നലെ രാത്രിയോടെയായിരുന്നു സംഭവം. കെഎസ്യു യൂണിറ്റ് ക്യാംപസില്‍ സ്ഥാപിച്ച കൊടിമരമാണ് തകര്‍ത്തിരിക്കുന്നത്. കെഎസ്യു പ്രവര്‍ത്തകര്‍ ഇത് സംബന്ധിച്ച്‌ പൊലീസില്‍ പരാതി നല്‍കിയിട്ടുണ്ട്. എന്നാല്‍ സംഭവ സ്ഥലത്തെത്തിയ പൊലീസുകാര്‍ സിസിടിവി ദൃശ്യങ്ങള്‍ പരിശോധിച്ചെന്നും എസ്‌എഫ്‌ഐ പ്രവര്‍ത്തകരെ തിരിച്ചറിഞ്ഞതായും കെഎസ്യു ഭാരവാഹികള്‍ കുറ്റപ്പെടുത്തുന്നു. തൃശൂര്‍ കേരളവര്‍മ്മ കോളെജില്‍ കെഎസ്യുവിന്റെ കൊടി തോരണങ്ങള്‍ എസ്‌എഫ്‌ഐ കൂട്ടിയിട്ട് കത്തിച്ചിരുന്നു. കെഎസ്യുവിനെതിരെ പ്രകോപന പ്രസംഗം നടത്തിയതിന് ശേഷമാണ് കൊടി തോരണങ്ങള്‍ കത്തിച്ചത്. കേരളവര്‍മ്മയില്‍ ഇനി കെഎസ്യു ഇല്ലെന്നും പ്രസംഗത്തില്‍ എസ്‌എഫ്‌ഐ പറഞ്ഞു. പിന്നാലെയാണ് തലസ്ഥാനത്തും കൊടിമരം തകര്‍ത്തിരിക്കുന്നത്. അതേസമയം, മാര്‍ ഇവാനിയോസ് ക്യാംപസില്‍ എസ്‌എഫ്‌ഐയുടെ ഭാഗത്ത് നിന്നും യാതൊരുവിധ അതിക്രമങ്ങളും ഉണ്ടായിട്ടില്ലെന്ന് നേതാക്കൾ പറഞ്ഞു