ആവശ്യങ്ങള്‍ അംഗീകരിക്കാത്തതിലും കേന്ദ്ര-സംസ്ഥാന സർക്കാരുകളുടെ സമീപനത്തില്‍ പ്രതിഷേധിച്ചും പഞ്ചാബില്‍ കർഷകർ പ്രഖ്യാപിച്ച ബന്ദ് ശക്തം.സംസ്ഥാനത്തിന്റെ വിവിധയിടങ്ങളില്‍ കർഷകർ റോഡ് ഉപരോധിക്കുകയാണ്. 150-ഓളം ട്രെയിനുകള്‍ റെയില്‍വേ റദ്ദാക്കിയിട്ടുണ്ട്. തിങ്കളാഴ്ച രാവിലെ ഏഴുമുതല്‍ വൈകീട്ട് നാലുവരെയാണ് ബന്ദ് പ്രഖ്യാപിച്ചത്. കോണ്‍ഗ്രസിന്റെ കർഷകവിഭാഗവും ബന്ദിന് പിന്തുണപ്രഖ്യാപിച്ചിട്ടുണ്ട്.
ധരേരി ജാട്ടൻ ടോള്‍പ്ലാസയ്ക്കടുത്ത് കർഷകർ റോഡില്‍ കുത്തിയിരുന്ന് പ്രതിഷേധിക്കുകയാണ്. ഇതിനെ തുടർന്ന് പാട്യാല-ചണ്ഡീഗഢ് ദേശീയപാതയിലെ ഗതാഗതം സ്തംഭിച്ചിട്ടുണ്ട്. അമൃതസറില്‍ കർഷകർ പ്രതിഷേധത്തിന്റെ ഭാഗമായി ഒത്തുചേർന്നിട്ടുണ്ട്. സംസ്ഥാനത്തെ ബന്ദ് പൂർണമായിരിക്കുമെന്നും അടിയന്തര സേവനങ്ങള്‍ മാത്രമേ അനുവദിക്കുകയുള്ളൂവെന്നും നേരത്തേ കർഷകസംഘടനയുടെ നേതാവ് സർവൻ സിങ് വ്യക്തമാക്കിയിരുന്നു
സംസ്ഥാനത്തെ ബസ്, തീവണ്ടി സർവീസുകള്‍ സ്തംഭിച്ചനിലയിലാണ്. ബന്ദിനെ തുടർന്ന് 150-ഓളം ട്രെയിനുകള്‍ റെയില്‍വേ റദ്ദാക്കിയിട്ടുണ്ട്.വന്ദേഭാരത്, ശതാബ്ദി ഉള്‍പ്പെടെയുള്ള ട്രെയിനുകള്‍ റദ്ദാക്കിയവയിലുണ്ട്. സംസ്ഥാനത്ത് 200 ഇടങ്ങളില്‍ ഗതാഗതം സ്തംഭിച്ചിട്ടുണ്ടെന്നാണ് റിപ്പോർട്ട്. സാഹചര്യം നിരീക്ഷിച്ചുവരുകയാണെന്നും ഏതാണ്ട് 600-ഓളം പോലീസുകാരെ മൊഹാലി ജില്ലയില്‍ വിന്യസിച്ചിട്ടുണ്ടെന്നും പോലീസ് അറിയിച്ചു.
തങ്ങളുടെ ആവശ്യം അംഗീകരിക്കണമെന്നും സർക്കാരുകളുടെ സമീപനത്തില്‍ മാറ്റംവേണമെന്നുമാണ് കർഷകർ ആവശ്യപ്പെടുന്നത്. വാഹനങ്ങളും സമരത്തില്‍ പങ്കുചേരും. സമരത്തിന്റെ ഭാഗമായി ജനുവരി നാലിന് കർഷക മഹാപഞ്ചായത്ത് ചേരുമെന്നും തുടർനടപടി യോഗത്തില്‍ തീരുമാനിക്കുമെന്നും കർഷകർ അറിയിച്ചിട്ടുണ്ട്.