കായിക കേരളത്തിന് കുതിപ്പേകി കേരള ക്രിക്കറ്റ് ലീഗിന്റെ പ്രഥമ പതിപ്പിന് ഗ്രീന്ഫീല്ഡ് സ്റ്റേഡിയത്തില് തുടക്കമായി.
തൃശൂര് ടൈറ്റന്സിനെ അഞ്ച് വിക്കറ്റിനു പരാജയപ്പെടുത്തി ആലപ്പുഴ റിപ്പിള്സ് ആദ്യ മത്സരം വിജയിച്ചു. 92 റണ്സുമായി ആലപ്പുഴയുടെ നായകന് മുഹമ്മദ് അസ്ഹറുദീന് കളിയിലെ താരമായി. ആദ്യം ബാറ്റ് ചെയ്ത തൃശൂര് ടൈറ്റന്സ് 161 റണ്സാണ് നേടിയത്. വിജയലക്ഷ്യം മറികടക്കാൻ ആലപ്പുഴ റിപ്പിള്സിന് 18.3 ഓവർ വേണ്ടി വന്നുള്ളൂ. നാല് ഓവറില് 32 റണ്സ് വിട്ടുകൊടുത്ത് ആലപ്പി റിപ്പിള്സിനു വേണ്ടി ആനന്ദ് ജോസഫ് മൂന്നു വിക്കറ്റും മൂന്ന് ഓവറില് 26 റണ്സ് വിട്ടുകൊടുത്ത് ഫാസില് ഫനൂസ് രണ്ട് വിക്കറ്റും നേടി.
സെപ്റ്റംബർ 16 വരെയാണ് ആദ്യ റൗണ്ട് മത്സരങ്ങള്. 17ന് സെമി ഫൈനല്. സെപ്റ്റംബർ 18 ന് നടക്കുന്ന ഫൈനലില് പ്രഥമ കേരള ക്രിക്കറ്റ് ലീഗിലെ വിജയിയെ നിശ്ചയിക്കും. മത്സരങ്ങള്ക്ക് പ്രവേശനം സൗജന്യമാണ്. സ്റ്റാർ സ്പോർട്സിലും ഒടിടി പ്ലാറ്റാഫോമായ ഫാന്കോഡിലും മത്സരങ്ങള് തത്സമയം സംപ്രേഷണം ചെയ്യും.വൈകിട്ട് നടന്ന ഔദ്യോഗിക ഉദ്ഘാടന ചടങ്ങില് കേരള ക്രിക്കറ്റ് ലീഗ് ബ്രാന്ഡ് അംബാസിഡര് ചലച്ചിത്ര താരം മോഹന്ലാല് മുഖ്യാതിഥിയായി. കേരള ക്രിക്കറ്റ് ലീഗിന്റെ ഔദ്യോഗിക ഗാനം പ്രശസ്ത ദക്ഷിണേന്ത്യൻ ഗായകൻ അരുണ് വിജയ് ആലപിച്ചു. വനിതാ ക്രിക്കറ്റ് ഗുഡ് വില് അംബാസിഡർ കീർത്തി സുരേഷ്, കേരള ക്രിക്കറ്റ് അസോസിയേഷന് പ്രസിഡന്റ് ജയേഷ് ജോര്ജ്, സെക്രട്ടറി വിനോദ് എസ്. കുമാര്, കേരള ക്രിക്കറ്റ് ലീഗ് ചെയര്മാന് നാസര് മച്ചാന് എന്നിവര് പങ്കെടുത്തു.