കഴിഞ്ഞ വർഷം റിലീസ് ചെയ്ത് ഇന്ത്യൻ ബോക്സ് ഓഫീസിൽ വമ്പൻ നേട്ടം കൊയ്ത ചിത്രമാണ് പുഷ്പ 2. അല്ലു അർജുൻ നായകനായി എത്തിയ ചിത്രം വിവിധ ഇന്റസ്ട്രികളിലെ റെക്കോർഡുകളെ അടക്കം ഭേദിച്ച് കൊണ്ടാണ് മുന്നേറിയത്. പ്രത്യേകിച്ച് ബോളിവുഡിൽ. ബോളിവുഡ് സിനിമാ ചരിത്രത്തിൽ ഏറ്റവും കൂടുതൽ കളക്ഷൻ നേടിയ ചിത്രം എന്ന ഖ്യാതിയും പുഷ്പ 2 ഹിന്ദിക്കാണ്. എന്നാൽ പുഷ്പയുടെ ഒരു റെക്കോർഡ് പുത്തൻ റിലീസ് മറി കടന്നിരിക്കുന്നു എന്ന വിവരമാണ് പുറത്തുവരുന്നത്. റിലീസ് ചെയ്ത് ആദ്യദിനം മുതൽ മികച്ച പ്രേക്ഷക നിരൂപക പ്രശംസ പിടിച്ചു പറ്റിയ ഛാവ ആണ് പുഷ്പ 2ന്റെ ഒരു റെക്കോർഡ് തകർത്തിരിക്കുന്നത്. മൂന്നാം വാരന്ത്യ കളക്ഷനാണ് ഇത്. പുഷ്പ 2വിനെക്കാൾ 3% അധിക വരുമാനം നേടിയാണ് ഛാവ ഈ നേട്ടം കൈവരിച്ചിരിക്കുന്നത്. വിക്കി കൗശലിൻ്റെ പീരിയഡ് ഡ്രാമ ചിത്രം മൂന്നാം വാരാന്ത്യത്തിൽ 60.10 കോടിയാണ് നേടിയിരിക്കുന്നതെന്ന് കോയ് മോയ് റിപ്പോർട്ട് ചെയ്യുന്നു. പുഷ്പ 2 നേടിയിരിക്കുന്നത് 60 കോടിയും ആണ്. മൂന്നാം വാരാന്ത്യം ഒരു ഹിന്ദി ചിത്രത്തിന് ലഭിക്കുന്ന ഏറ്റവും വലിയ കളക്ഷൻ എന്ന ഖ്യാതിയും ഇനി മുതൽ ഛാവയ്ക്ക് സ്വന്തമാണ്. സ്ത്രീ ടു {48.75 കോടി}, ബാഹുബലി 2 ഹിന്ദി {42.55 കോടി} എന്നീ ചിത്രങ്ങളാണ് മറ്റ് സ്ഥാനങ്ങളിലുള്ള സിനിമകൾ.അതേസമയം, 471.56 കോടി രൂപയാണ് ഛാവ ഇതുവരെ നേടിയ ആഗോള ബോക്സ് ഓഫീസ് കളക്ഷൻ. ഈ വാരം അവസാനിക്കുന്നതിന് മുൻപ് ചിത്രം 500 കോടി ക്ലബ്ബ് എന്ന നേട്ടവും സ്വന്തമാക്കും. ഒന്നാം വാരം 225.28 കോടി, രണ്ടാം വാരം 186.18 കോടി, മൂന്നാം വെള്ളി 13.30 കോടി, മൂന്നാം ശനി 22.50 കോടി, മൂന്നാം ഞായർ 24.30 എന്നിങ്ങനെയാണ് ഛാവ നേടിയത്. എന്തായാലും ഈ വർഷം ആദ്യം പരാജയങ്ങൾ നേരിട്ട ബോളിവുഡിന് വലിയൊരു ആശ്വാസമാണ് ഛാവ സമ്മാനിച്ചിരിക്കുന്നതെന്ന് നിസംശയം പറയാം.