തനിക്ക് ആരോഗ്യ പ്രശ്നങ്ങളുണ്ടെന്ന വാർത്തകള്‍ തള്ളി ഇന്ത്യൻ വംശജയായ നാസയുടെ ബഹിരാകാശ സഞ്ചാരി സുനിത വില്യംസ്.
ഭൂമിയില്‍ നിന്ന് പുറപ്പെട്ടപ്പോഴുള്ള അതേ ഭാരം തന്നെയാണ് തനിക്കുള്ളതെന്ന് സുനിത പറഞ്ഞു. ബഹിരാകാശത്തെ മൈക്രോ ഗ്രാവിറ്റിയെ ചെറുക്കാനുള്ള കഠിനമായ വ്യായാമങ്ങള്‍ പിന്തുടരുന്നതു കൊണ്ടാണ് ശരീരത്തില്‍ രൂപമാറ്റമുണ്ടായതെന്നും വീഡിയോ സന്ദേശത്തില്‍ സുനിത പ്രതികരിച്ചു.
ജൂണ്‍ മുതല്‍ അന്താരാഷ്ട്ര ബഹിരാകാശ നിലയത്തില്‍ തുടരുകയാണ് സുനിത. അടുത്തിടെ നാസ പുറത്തുവിട്ട ചിത്രത്തില്‍ സുനിതയുടെ ശരീരം മെലിഞ്ഞ് കവിളുകള്‍ വളരെ ഒട്ടിയ നിലയിലായിരുന്നു. ഇതോടെ സുനിതയ്ക്ക് ആരോഗ്യപ്രശ്നങ്ങളുണ്ടെന്ന് അഭ്യൂഹം ഉയരുകയായിരുന്നു.