ആത്മകഥാ വിവാദത്തില് സിപിഐഎം കേന്ദ്ര കമ്മിറ്റി അംഗം ഇ പി ജയരാജന്റെ മൊഴി രേഖപ്പെടുത്തി. കണ്ണൂര് കീച്ചേരിയിലെ ജയരാജന്റെ വീട്ടില് വെച്ചാണ് മൊഴി രേഖപ്പെടുത്തിയത്.
പുസ്തക വിവാദത്തില് വിശദമായ അന്വേഷണം നടത്തുന്നതിന്റെ ഭാഗമായാണ് മൊഴിയെടുപ്പ് നടപടി. ഡിസി ബുക്സ് ഉടമ രവി ഡിസിയുടെ മൊഴി രേഖപ്പെടുത്താനും പൊലീസ് തീരുമാനിച്ചിട്ടുണ്ട്.
ഡിസി ബുക്സിനെതിരെ ജയരാജന് നിയമ നടപടി സ്വീകരിച്ചിരുന്നു. ആത്മകഥയില് തെറ്റായ കാര്യങ്ങള് ഉള്പ്പെടുത്തി പ്രചരിപ്പിച്ചതിനെതിരെയായിരുന്നു നിയമനടപടി. പുസ്തകം പ്രസിദ്ധീകരിക്കുന്നതുമായി ഇപി ജയരാജനും ഡിസി ബുക്സും തമ്മില് കരാറുണ്ടോയെന്ന കാര്യവും പൊലീസ് പരിശോധിക്കും.
കട്ടന്ചായയും പരിപ്പുവടയും എന്ന പേരിലാണ് ഡിസി ബുക്സ് ഇ പി ജയരാജന്റെ ആത്മകഥയുടെതെന്ന പേരില് കവര്ചിത്രം പുറത്തുവിട്ടത്. വയനാട്, ചേലക്കര ഉപതിരഞ്ഞെടുപ്പ് നടക്കുന്ന ദിവസമായിരുന്നു സംഭവം. പുസ്തകത്തിന്റെ ഉള്ളടക്കമെന്ന പേരില് വലിയ വിവാദമായതോടെയാണ് ജയരാജന് നിയമ നടപടിയിലേക്ക് നീങ്ങിയത്.