എത്യോപ്യൻ ഓർത്തഡോക്സ് സഭയുടെ സ്ലീബാ പെരുന്നാൾ ആഘോഷത്തിൽ ഓർത്തഡോക്സ് സഭാധ്യക്ഷൻ മുഖ്യാതിഥിയാകും. എത്യോപ്യൻ ഓർത്തഡോക്സ് സഭയുടെ പാത്രിയർക്കീസ് പരിശുദ്ധ ആബൂനാ മത്ഥ്യാസിന്റെ ക്ഷണം സ്വീകരിച്ചാണ് സന്ദർശനം. പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവായ്ക്ക് ബോലെ അന്താരാഷ്ട്ര വിമാനത്താവളത്തിലും, ആഡിസ് അബാബ ഹോളി ട്രിനിറ്റി കത്തീഡ്രലിലും ഔദ്യോഗിക സ്വീകരണം നൽകി. ഹോളി ട്രിനിറ്റി കത്തീഡ്രലിൽ എത്യോപ്യൻ പാത്രിയർക്കീസ് പരിശുദ്ധ ആബൂന മത്ഥ്യാസ് മലങ്കരസഭാധ്യക്ഷനെ സ്വീകരിച്ചു. തുടർന്ന് ഇരുവരും ചേർന്ന് കത്തീഡ്രലിൽ പ്രാർത്ഥന നടത്തി. മലങ്കരസഭയുടെ പ്രതിനിധി സംഘവും കാതോലിക്കാ ബാവായ്ക്കൊപ്പമുണ്ട്.നാളെയാണ് ഇത്യോപ്യൻ ഓർത്തഡോക്സ് സഭയുടെ സ്ലീബാ പെരുന്നാൾ. അഡിസ് അബാബയിലെ മെസ്ക്കൽ സ്ക്വയർ ചടങ്ങുകൾക്കു വേദിയാകും.അലക്സിയോസ് മാർ യൗസേബിയോസ്, ഡോ. യൂഹാനോൻ മാർ ദിയസ്കോറസ്, ഫാ. ഡോ. ജോസി ജേക്കബ്, ഫാ. അശ്വിൻ ഫെർ ണാണ്ടസ്, ഫാ. ഗീവർഗീസ് ജോൺസൺ, ജേക്കബ് മാത്യു, ജോജോ പി.ജോൺ എന്നിവരാണ് ഓർത്തഡോക്സ് സഭാ പ്രതിനിധി സംഘത്തിലുള്ളത്.