സംസ്ഥാനത്ത് പാചകവാതക വിതരണം താറുമാറായ സാഹചര്യത്തില്, കേന്ദ്ര സർക്കാരിന്റെ വീഴ്ചകള്ക്കെതിരെ എല്ഡിഎഫിന്റെ നേതൃത്വത്തില് ഇന്ന് തിരുവനന്തപുരത്ത് പ്രതിഷേധ ധർണ സംഘടിപ്പിക്കും.ജിപിഒയ്ക്ക് മുന്നില് നടക്കുന്ന പ്രതിഷേധം എല്ഡിഎഫ് കണ്വീനർ ടി പി രാമകൃഷ്ണൻ ഉദ്ഘാടനം ചെയ്യും. കേന്ദ്ര സർക്കാരിന്റെ വിദേശനയങ്ങളും വിതരണ ശൃംഖലയിലെ പാളിച്ചകളുമാണ് നിലവിലെ പ്രതിസന്ധിക്ക് കാരണമെന്ന് എല്ഡിഎഫ് ആരോപിക്കുന്നു.വാണിജ്യ സിലിണ്ടറുകളുടെ വിതരണം പൂർണ്ണമായും നിലച്ചതും ഗാർഹിക സിലിണ്ടറുകള്ക്ക് കടുത്ത ക്ഷാമം നേരിടുന്നതും വിപണിയെ സാരമായി ബാധിച്ചിട്ടുണ്ട്. കഴിഞ്ഞ ദിവസങ്ങളില് വിവിധ ജില്ലകളിലെ കേന്ദ്ര സർക്കാർ സ്ഥാപനങ്ങളിലേക്ക് എല്ഡിഎഫ് പ്രതിഷേധം വ്യാപിപ്പിച്ചിരുന്നു. അന്താരാഷ്ട്ര തലത്തിലെ രാഷ്ട്രീയ നീക്കങ്ങളും കേന്ദ്രത്തിന്റെ നിസ്സംഗതയുമാണ് ഇന്ധന വിപണിയില് പെട്ടെന്നുണ്ടായ ഈ തളർച്ചയ്ക്ക് പിന്നിലെന്നാണ് ഉയരുന്ന പ്രധാന വിമർശനം.