കർണാടക മുഖ്യമന്ത്രി സ്ഥാനത്ത് നിന്ന് രാജിവെയ്ക്കുന്നതായി മന്ത്രിമാരെ അറിയിച്ച് സിദ്ധരാമയ്യ. അടുത്ത മുഖ്യമന്ത്രിയെ ഹൈക്കമാൻഡ് തീരുമാനിക്കുമെന്നും സിദ്ധരാമയ്യ യോഗത്തില് വ്യക്തമാക്കി.അഭ്യൂഹങ്ങള്ക്കും ഊഹാപോഹങ്ങള്ക്കും വിരാമമിട്ടു കൊണ്ടാണ് സിദ്ധരാമയ്യ ഇപ്പോള് രാജി പ്രഖ്യാപിച്ചിരിക്കുന്നത്. ഇന്ന് രാവിലെ മറ്റ് മന്ത്രിമാരെ അദ്ദേഹം പ്രാതലിന് ക്ഷണിച്ചിരുന്നു. അദ്ദേഹത്തിന്റെ ഔദ്യോഗിക വസതിയായ കാവേരിയിലായിരുന്നു പ്രഭാതഭക്ഷണം. ഭക്ഷണം കഴിക്കുന്നതിനിടെയാണ് അദ്ദേഹം മന്ത്രിമാരെ അഭിസംബോധന ചെയ്ത് ഇക്കാര്യം അറിയിച്ചത്. താൻ മുഖ്യമന്ത്രി സ്ഥാനം ഒഴിയുകയാണെന്ന് അറിയിച്ചു. ഡി കെ ശിവകുമാറിനെ മുഖ്യമന്ത്രി സ്ഥാനത്തേക്ക് പിന്തുണക്കണമെന്നും അദ്ദേഹം ആവശ്യപ്പെട്ടു.വസതിയിലെത്തിയ ഡി.കെ. ശിവകുമാറും സിദ്ധരാമയ്യയും കെട്ടിപ്പിടിച്ചു. ശിവകുമാർ സിദ്ധരാമയ്യയുടെ പാദങ്ങൾ തൊട്ട് അനുഗ്രഹം വാങ്ങി. സിദ്ധരാമയ്യ ഇന്ന് വൈകിട്ട് 3 മണിക്ക് ശേഷം രാജിവച്ചേക്കാമെന്ന് കോൺഗ്രസ് എംഎൽഎ അശോക് കെ.പട്ടൻ പറഞ്ഞു. സിദ്ധരാമയ്യ ഗവർണറെ കാണാൻ സമയം ചോദിച്ചിട്ടുണ്ട്. അടുത്ത മുഖ്യമന്ത്രി ആരാണെന്ന് ഹൈക്കമാൻഡ് തീരുമാനിക്കുമെന്നും പട്ടൻ മാധ്യമപ്രവർത്തകരോട് പറഞ്ഞു. സിദ്ധരാമയ്യ സ്ഥാനം ഒഴിഞ്ഞാൽ ഒന്നിലധികം ഉപമുഖ്യമന്ത്രിമാരെ നിയമിക്കുന്നത് ഉൾപ്പെടെയുള്ള നിരവധി ഫോർമുലകൾ ചർച്ച ചെയ്യപ്പെടുന്നുണ്ടെന്ന് നേതാക്കൾ പറഞ്ഞു.