ആലപ്പുഴ കരുവാറ്റയിലെ വയോധികന്റെ കൊലപാതകത്തില് 13 വയസുള്ള കൊച്ചുമകള് ഉള്പ്പെടെ പ്രായപൂര്ത്തിയാകാത്ത നാല് പേര് പിടിയില്. കഴിഞ്ഞദിവസം രാത്രിയായിരുന്നു കൊലപാതകം. കൊല്ലപ്പെട്ട ശിവന്കുട്ടിയുടെ മകളുടെ മകള് നല്കിയ ക്വട്ടേഷനാണ് കൊലപാതകത്തില് കലാശിച്ചതെന്ന് പൊലീസ് കണ്ടെത്തി. ശിവന്കുട്ടിയുടെ ഭാര്യയും മകളും വീട്ടിലില് ഇല്ലാതിരുന്ന സമയത്തായിരുന്നു സംഭവം.
അന്വേഷണത്തിന്റെ ആദ്യ ഘട്ടത്തില് തന്നെ ഒരു പ്രൊഫഷണല് കൊലപാതകിയല്ല ഇതിന് പിന്നിലെന്ന് പൊലീസ് ഉറപ്പിച്ചിരുന്നു. വീട്ടിനുള്ളില് ഒരാളുടെ സഹായം ലഭിച്ചിട്ടുണ്ടെന്ന സംശയം നിലനില്ക്കേയാണ് എട്ടാം ക്ലാസുകാരിയാണ് കൊലയ്ക്ക് പിന്നിലെന്ന് പൊലീസ് മനസിലാക്കിയത്. 67 വയസുള്ള ശിവന്കുട്ടിയുടെ മൃതദേഹം വിവസ്ത്രനായ നിലയിലാണ് കണ്ടെത്തിയത്. കൈകളും കാലുകളും ബന്ധിച്ചിരുന്നു. വീട്ടിനുള്ളിലാകെ മുളകുപൊടി വിതറിയിരുന്നു. വീട്ടില് നിന്നും ആറു പവന് സ്വര്ണവും കാണാതായിട്ടുണ്ട്. പ്രതികള് നിലവില് ഹരിപ്പാട് പൊലീസിന്റെ കസ്റ്റഡിയിലാണ്.
ശിവന്കുട്ടിയുടെ മകളെ പ്രസവത്തിനായി ആലപ്പുഴ വണ്ടാനം മെഡിക്കല് കോളേജില് പ്രവേശിപ്പിച്ചിരിക്കുകയാണ്. ശിവന്കുട്ടിയുടെ ഭാര്യയും ഇവര്ക്കൊപ്പമാണ്. ഇതോടെ എട്ടാം ക്ലാസ് വിദ്യാര്ത്ഥിനിയെ മറ്റൊരു ബന്ധുവീട്ടിലേക്ക് മാറ്റിയിരുന്നു. കഴിഞ്ഞദിവസം പരീക്ഷയുണ്ടെന്ന പേരില് അവിടെ നിന്നിറങ്ങിയ വിദ്യാര്ത്ഥിനിയാണ് വീട്ടിലെത്തി ആദ്യം മൃതദേഹം കണ്ടെന്ന് അറിയിച്ചത്. വീട് തുറക്കാന് കഴിയുന്നില്ല അകത്ത് നിന്നും പൂട്ടിയിരിക്കുകയാണെന്നായിരുന്നു പെണ്കുട്ടി പറഞ്ഞത്. മുത്തച്ഛന് മരിച്ചു കിടക്കുന്നത് നേരിട്ട് കണ്ടിട്ടും കുട്ടിക്ക് ഭാവവ്യത്യാസങ്ങളൊന്നും ഉണ്ടായിരുന്നില്ല. ആദ്യഘട്ട ചോദ്യം ചെയ്യലില് പെണ്കുട്ടി സംശയിക്കപ്പെട്ടിരുന്നില്ല. തുടര്ന്ന് പരീക്ഷ എഴുതാന് സ്കൂളില് പോകണമെന്ന് പെണ്കുട്ടി ആവശ്യപ്പെട്ടു. ഇതോടെ പെണ്കുട്ടിയുടെ പെരുമാറ്റത്തില് സംശയം തോന്നി പൊലീസ് നടത്തിയ ചോദ്യം ചെയ്യലിലാണ് സംഭവം പുറത്തായത്. പെണ്കുട്ടിക്ക് മുത്തച്ഛനോടുള്ള വൈരാഗ്യം എന്താണെന്ന് വ്യക്തമല്ല. കൂട്ടുപ്രതികൾ കൂടെ പഠിച്ചവരും പരിചയക്കാരുമാണ്. പ്രായപൂര്ത്തിയായ ആരുടെയെങ്കിലും സഹായം പ്രതികള്ക്ക് ലഭിച്ചിട്ടുണ്ടോ എന്ന് പൊലീസ് അന്വേഷിക്കുന്നുണ്ട്. ശ്വാസം മുട്ടിച്ചാണ് ശിവന്കുട്ടിയെ കൊലപ്പെടുത്തിയത്.