ശബരിമലയിലെ അരവണ പ്രതിസന്ധി പരിഹരിക്കുന്നതിനായി അരവണ നിർമാണ പ്ലാന്റ് ഭാഗികമായി പ്രവർത്തനസജ്ജമാക്കാൻ ദേവസ്വം ബോർഡ് ഊർജിത ശ്രമങ്ങൾ ആരംഭിച്ചു. വരുന്ന തുലാമാസ പൂജയ്ക്ക് മുന്നോടിയായി, ഒക്ടോബർ 7-നകം കുറഞ്ഞത് 12 വാർപ്പുകളുടെയെങ്കിലും നിർമാണം പൂർത്തിയാക്കാനാണ് ബോർഡ് ലക്ഷ്യമിടുന്നത്. ആകെ 26 വാർപ്പുകളുള്ള പ്ലാന്റിൽ നിർമാണ പ്രവർത്തനങ്ങളിലെ മെല്ലെപ്പോക്ക് മണ്ഡലകാലത്തെയും ബാധിക്കുമെന്ന ആശങ്ക നിലനിൽക്കുന്നുണ്ട്. സീസൺ കാലത്ത് 70 ലക്ഷം അരവണ കരുതൽ ശേഖരം ഉറപ്പാക്കാൻ മുഖ്യമന്ത്രിയുടെ അവലോകന യോഗത്തിൽ തീരുമാനിച്ചിരുന്നെങ്കിലും, പ്ലാന്റ് പൂർണതോതിൽ പ്രവർത്തിച്ചാൽ മാത്രമേ തുലാമാസ പൂജയ്ക്ക് ശേഷം 50 ലക്ഷം എണ്ണമെങ്കിലും കരുതാനാകൂ എന്ന് വിലയിരുത്തപ്പെടുന്നു. പ്രതിസന്ധി പരിഹരിക്കുന്നതിന്റെ ഭാഗമായി ദേവസ്വം മന്ത്രിയും മുഖ്യമന്ത്രിയും തമ്മിൽ കൂടിക്കാഴ്ച നടത്തുമെന്നും വിവരമുണ്ട്.