പരീക്ഷാ ക്രമക്കേടുമായി ബന്ധപ്പെട്ട് പിഎസ്‌സി മുൻ ഡെപ്യൂട്ടി സെക്രട്ടറി പി. സതീഷിനെ ക്രൈംബ്രാഞ്ച് പ്രത്യേക അന്വേഷണ സംഘം അറസ്റ്റ് ചെയ്തു.പിഎസ്‌സിയുമായി ബന്ധപ്പെട്ട ക്രമക്കേട് കേസുകളിലെ ആദ്യ അറസ്റ്റാണിത്. ആസൂത്രണ ബോർഡ് ചീഫ് തസ്തികയിലേക്കുള്ള പരീക്ഷാ നടത്തിപ്പിന്റെ ചുമതലയുണ്ടായിരുന്ന സതീഷിനെയും അഡീഷണൽ സെക്രട്ടറി ആർ. ഹരിയെയു പ്രതിചേർത്ത് തിരുവനന്തപുരം വിജിലൻസ് കോടതിയിൽ റിപ്പോർട്ട് നൽകിയ ശേഷമാണ് എസ്ഐടി അറസ്റ്റിലേക്ക് നീങ്ങിയത്. 58 മാർക്കിന്റെ 10 ചോദ്യങ്ങൾ മൂല്യനിർണയം നടത്താതിരുന്ന പരീക്ഷയിൽ ഇടതു സംഘടനാനേതാവ് ഒന്നാം റാങ്ക് നേടിയതിൽ ഗുരുതര ക്രമക്കേട് നടന്നതായി അന്വേഷണത്തിൽ കണ്ടെത്തിയിരുന്നു. അഴിമതി നിരോധനം, പൊതുസേവകരുടെ വിശ്വാസവഞ്ചന തുടങ്ങിയ വകുപ്പുകളാണ് ചുമത്തിയിരിക്കുന്നത്. ഹരി ഒളിവിലാണെന്നും, വരുന്ന ദിവസങ്ങളിൽ കൂടുതൽ അറസ്റ്റുകൾ ഉണ്ടാകുമെന്നും സൂചനയുണ്ട്.