പത്തനംതിട്ട അടൂർ മണക്കാല അന്തിച്ചിറ തുവയൂർ വടക്ക് കോട്ടൂർ ഭഗവതി ക്ഷേത്രത്തിൽ വൻ കവർച്ച.ഭക്തർ വഴിപാടായി സമർപ്പിച്ച എട്ട് സ്വർണ താലികളും, ഓഫീസിൽ സൂക്ഷിച്ചിരുന്ന പണവും കാണിക്കവഞ്ചികൾ കുത്തിത്തുറന്നുമാണ് മോഷ്ടാക്കൾ കവർന്നത്. സംഭവവുമായി ബന്ധപ്പെട്ട് സഹായനിധി വഞ്ചി ഉൾപ്പെടെ 11 കാണിക്കവഞ്ചികൾ കുത്തിത്തുറക്കപ്പെട്ടിട്ടുണ്ട്. കൂടാതെ, തെളിവുകൾ നശിപ്പിക്കുന്നതിന്റെ ഭാഗമായി സിസിടിവി ക്യാമറകളുടെ രണ്ട് ഡിവിആറുകളും മോഷ്ടാക്കൾ കൊണ്ടുപോയിട്ടുണ്ട്. ശ്രീകോവിലിനുള്ളിൽ പ്രവേശിക്കാതെയാണ് കവർച്ച നടത്തിയിരിക്കുന്നത്. വിവരമറിഞ്ഞ് സ്ഥലത്തെത്തിയ അടൂർ പോലീസ് കേസെടുത്ത് അന്വേഷണം ആരംഭിക്കുകയും വിരലടയാള വിദഗ്ധരുടെയും ഡോഗ് സ്ക്വാഡിന്റെയും സഹായത്തോടെ തെളിവെടുപ്പ് നടത്തുകയും ചെയ്തിട്ടുണ്ട്.