ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെ ബി.ജെ.പി സംസ്ഥാന അധ്യക്ഷൻ രാജീവ് ചന്ദ്രശേഖർ നടത്തിയ വ്യക്തിപരമായ അധിക്ഷേപങ്ങൾക്കെതിരെ വിമർശനവുമായി മുഖ്യമന്ത്രി വി.ഡി. സതീശൻ .ജനാധിപത്യത്തിന്റെയും മതേതരത്വത്തിന്റെയും സംരക്ഷകരാണ് കോൺഗ്രസും രാഹുൽ ഗാന്ധിയെന്നും, രാജീവ് ചന്ദ്രശേഖർ അടക്കം ബി.ജെ.പിയുടെ ഒരു നേതാവിനും തങ്ങൾ മതേതരത്വം സംരക്ഷിക്കുന്നവരാണെന്ന് നെഞ്ചിൽ കൈവെച്ച് പറയാൻ കഴിയില്ലെന്നും അദ്ദേഹം ഫേസ്ബുക്കിൽ കുറിച്ചു.രാഷ്ട്രീയത്തിന്റെ ഔന്നത്യവും സാംസ്കാരിക മര്യാദകളും കാത്തുസൂക്ഷിക്കേണ്ട പദവിയിലിരുന്ന് അടിസ്ഥാനരഹിതമായ ആക്ഷേപങ്ങളും വിലകുറഞ്ഞ പ്രയോഗങ്ങളും നടത്തുന്നത് രാഷ്ട്രീയ പാപ്പരത്തമാണ് വെളിപ്പെടുത്തുന്നത്. രാഹുൽ ഗാന്ധിക്കെതിരെ ഒരു വിരൽ ചൂണ്ടുമ്പോൾ മറ്റ് വിരലുകൾ സ്വന്തം നെഞ്ചിലേക്കാണെന്നത് രാജീവ് ചന്ദ്രശേഖർ ഓർക്കണമെന്നും അദ്ദേഹം വ്യക്തമാക്കി.തിരഞ്ഞെടുപ്പ് കമ്മീഷന്റെ വിശ്വാസ്യതയെയും സ്വയംഭരണ സ്ഥാപനങ്ങളുടെ നിഷ്പക്ഷതയെയും കുറിച്ച് ഗുരുതരമായ ആശങ്കകളാണ് നിലവിലുള്ളത്. രാജ്യത്തിന്റെ ഭരണഘടനയും ജനാധിപത്യ സ്ഥാപനങ്ങളും ഒരു കൂട്ടരുടെ താല്പര്യങ്ങൾക്ക് അടിയറവുവെക്കുമ്പോൾ, അതിനെതിരെ രാഹുൽ ഗാന്ധിയും കോൺഗ്രസും സധൈര്യം ശബ്ദമുയർത്തുന്നത് സംഘ്പരിവാറിന് അസ്വസ്ഥത ഉണ്ടാക്കുന്നുണ്ട്. യഥാർത്ഥ പ്രശ്നങ്ങളിൽ നിന്നും ശ്രദ്ധ തിരിച്ചുവിടാൻ ഇത്തരം ഫാസിസ്റ്റ് ശൈലിയിലുള്ള പ്രസ്താവനകൾകൊണ്ട് സാധ്യമല്ലെന്നും പോസ്റ്റിൽ ചൂണ്ടിക്കാണിക്കുന്നു.ജനങ്ങളുടെ മൗലികാവകാശങ്ങളും തുല്യനീതിയും സംരക്ഷിക്കാൻ രാഹുൽ ഗാന്ധിയും കോൺഗ്രസും നടത്തുന്ന നിരന്തരമായ പോരാട്ടങ്ങളെ ഭീഷണികൾ കൊണ്ടോ വെല്ലുവിളികൾ കൊണ്ടോ തളർത്താനാവില്ല. പൊള്ളയായ അവകാശവാദങ്ങളും ജനദ്രോഹ നയങ്ങളും മാറ്റിവെച്ച്, യഥാർത്ഥ ജനകീയ പ്രശ്നങ്ങൾക്ക് മറുപടി പറയാനുള്ള ആർജ്ജവമാണ് ബി.ജെ.പിയും അവരുടെ സംസ്ഥാന അധ്യക്ഷനും കാണിക്കേണ്ടതെന്നും വി.ഡി. സതീശൻ കൂട്ടിച്ചേർത്തു.