തെരഞ്ഞെടുപ്പ് ഫലം ബിജെപിക്ക് അനുകൂലമാക്കാന് തെരഞ്ഞെടുപ്പ് കമ്മീഷന് വോട്ടുകൊള്ള നടത്തിയെന്ന രാഹുല് ഗാന്ധിയുടെ വെളിപ്പെടുത്തലിനു പിന്നാലെ, വോട്ടുകൊള്ളയുമായി ബന്ധപ്പെട്ട വിവരങ്ങള് അറിയിക്കാനും പിന്തുണ നല്കാനുമായി കോണ്ഗ്രസ് വെബ്സൈറ്റ് ആരംഭിച്ചു.തെരഞ്ഞെടുപ്പില് വോട്ട് കൊള്ള തടയാനുള്ള പ്രചാരണത്തില് പങ്കുചേരാന് ജനങ്ങളോട് ആഹ്വാനം ചെയ്തുകൊണ്ടാണ് ലോക്സഭാ പ്രതിപക്ഷ നേതാവിന്റെ നീക്കം. ‘വോട്ട് ചോരി ഇന്’ എന്ന വെബ്സൈറ്റ് ആരംഭിച്ചു കൊണ്ടാണ് രാഹുല് ഗാന്ധിയുടെ പ്രചാരണം. തെരഞ്ഞെടുപ്പ് പ്രക്രിയ സുതാര്യമാക്കുന്നതിനും വോട്ടര് പട്ടികയിലെ ക്രമക്കേടുകള് തടയുന്നതിനും ഡിജിറ്റല് പ്ലാറ്റ്ഫോം ലക്ഷ്യമിടുന്നതായി രാഹുല് പറഞ്ഞു.വെബ്സൈറ്റില് ‘വോട്ട് ചോരി പ്രൂഫ്, ഡിമാന്ഡ് ഇസി (ഇലക്ഷന് കമ്മീഷന്) അക്കൗണ്ടബിലിറ്റി, റിപ്പോര്ട്ട് വോട്ട് ചോരി’ എന്നിങ്ങനെ മൂന്ന് ഓപ്ഷനുകളുണ്ട്. ഇതില് വോട്ട് ചോര്ച്ചയുമായി ബന്ധപ്പെട്ട് എന്തെങ്കിലും അനുഭവമുണ്ടെങ്കില് അതേപ്പറ്റി ജനങ്ങള്ക്ക് തുറന്നെഴുതാവുന്നതാണ്. കോണ്ഗ്രസാണ് ക്യാമ്പയ്ന് തുടക്കമിട്ടിരിക്കുന്നത്. ബിജെപിയും തെരഞ്ഞെടുപ്പ് കമ്മീഷനും തമ്മിലുള്ള ഒത്തുകളിയിലൂടെ വലിയ തട്ടിപ്പാണ് നടക്കുന്നതെന്ന് രാഹുല് ഗാന്ധി വിഡിയോയില് പറയുന്നു.കഴിഞ്ഞ ദിവസമായിരുന്നു തെരഞ്ഞെടുപ്പ് കമ്മീഷനെതിരെ ആഞ്ഞടിച്ച് രാഹുല് ഗാന്ധിയുടെ വാര്ത്താസമ്മേളനം. രാജ്യത്ത് വോട്ട് മോഷണം നടക്കുന്നുണ്ടെന്നും ഹരിയാന തെരഞ്ഞെടുപ്പോടെ അത് വ്യക്തമായതാണെന്നുമായിരുന്നു രാഹുല് ഗാന്ധി പറഞ്ഞത്. ഇതുമായി ബന്ധപ്പെട്ട തെളിവുകളും രാഹുല് പുറത്തുവിട്ടിരുന്നു.