ഒളിമ്പിക്സ് മാതൃകയിൽ നടത്തിയ ആദ്യ സംസ്ഥാനസ്കൂൾ കായികമേളയിൽ തിരുവനന്തപുരം ചാമ്പ്യന്മാരായി. വ്യത്യസ്തത കൊണ്ട് ശ്രദ്ധേയമായ കായികമേളയിൽ മുഖ്യമന്ത്രിയുടെ ആദ്യ എവര്‍ റോളിംഗ് ട്രോഫിക്ക് തലസ്ഥാനജില്ല അര്‍ഹരായി. 1935 പോയിന്റോടെയാണ് തിരുവനന്തപുരം ചാമ്പ്യന്മാരായത്. ഗെയിംസിലെയും അക്വാട്ടിക്‌സിലെയും മികച്ച പ്രകടനമാണ് തിരുവനന്തപുരത്തിന് കരുത്തായത്. 848 പോയിന്റോടെ തൃശ്ശൂര്‍ രണ്ടാമതായപ്പോള്‍ 824 പോയിന്റോടെ മലപ്പുറം മൂന്നാമതെത്തി.
വ്യക്തിഗത ചാമ്പ്യന്മാര്‍
സീനിയര്‍ ആണ്‍കുട്ടികളുടെ വിഭാഗത്തില്‍ മൂന്ന് പേരാണ് വ്യക്തിഗത ചാമ്പ്യന്മാരായത്. രണ്ട് മീറ്റ് റെക്കോര്‍ഡുകള്‍ സ്വന്തമാക്കിയ മലപ്പുറം കെ കെ എം എച്ച് എസ് എസ് ചീക്കോടിലെ എം പി മുഹമ്മദ് അമീന്‍, കാസര്‍കോട് കുട്ടമത്ത് ജി എച്ച് എസ് എസിലെ കെ സി സര്‍വ്വന്‍, സ് പ്രിന്റിൽ ഡബിള്‍ നേടിയ തിരുവനന്തപുരം ജി വി രാജാ സ്പോര്ട്സ് സ്‌കൂളിലെ മുഹമ്മദ് അഷ്ഫാഖ് എന്നിവരാണ് വ്യക്തിഗത ചാമ്പ്യന്മാര്‍. മൂന്ന് പേര്‍ക്കും പത്ത് പോയിന്റാണുള്ളത്.
സീനിയര്‍ പെണ്‍കുട്ടികളില്‍ പാലക്കാട് പറളി എച്ച് എസിലെ എം ജ്യോതിക വ്യക്തിഗത ചാമ്പ്യനായി. നാല് സ്വര്‍ണമാണ് ജ്യോതിക നേടിയത്. കഴിഞ്ഞ കൊല്ലവും ജ്യോതിക തന്നെയായിരുന്നു വ്യക്തിഗതചാമ്പ്യന്‍. മുഖ്യമന്ത്രിയാണ് അവാര്‍ഡുകള്‍ വിതരണം ചെയ്തത്.
ആര്‍ ശ്രേയ ആണ് ജൂനിയര്‍ പെണ്‍കുട്ടികളിലെ വ്യക്തിഗത ചാമ്പ്യന്‍. സെന്റ് ജോസഫ്‌സ് ജി എച്ച് എസ് എസ് ആലപ്പുഴയിലെ വിദ്യാര്‍ത്ഥിയാണ്. ഫുട്‌ബോള്‍ താരം ഐ എം വിജയനാണ് 13 പോയിന്റ് നേടിയ ശ്രേയക്ക് ട്രോഫി സമ്മാനിച്ചത്.
ജൂനിയര്‍ ആണ്‍കുട്ടികളില്‍ എം അമൃത് വ്യക്തിഗത ചാമ്പ്യനായി. കെ എച്ച് എസ് കുമരംപുത്തൂരിലെ പ്ലസ് വണ്‍ വിദ്യാര്‍ത്ഥിയാണ്. ട്രാക്കില്‍ ഹാട്രിക് സ്വര്‍ണമാണ് അമൃത് നേടിയത്. കൊച്ചി മേയര്‍ അഡ്വ. എം അനില്‍കുമാ൪ പുരസ്‌കാരം നല്‍കി.
സബ് ജൂനിയര്‍ ആണ്‍കുട്ടികളില്‍ തിരുവനന്തപുരം ജി വി രാജ സ്പോര്ട്സ് സ്‌കൂളിലെ പി കെ സായൂജ് വ്യക്തിഗത ചാമ്പ്യനായി. 11 പോയിന്റാണ് സായൂജ് നേടിയത്. കൊച്ചി മേയര്‍ അഡ്വ. എം അനില്‍കുമാ൪ പുരസ്‌കാരം നല്‍കി.
സെന്റ് ജോര്‍ജ്‌സ് എച്ച് എസ് എസ് കുളത്തുവയലിലെ അല്‍ക്ക ഷിനോജ് 15 പോയിന്റോടെ സബ് ജൂനിയര്‍ പെണ്‍കുട്ടികളില്‍ ചാമ്പ്യനായി. കൊച്ചി മേയര്‍ അഡ്വ. എം അനില്‍കുമാ൪ പുരസ്‌കാരം നല്‍കി.
അത്‌ലറ്റിക്സിലും ഗെയിംസിലും തിരുവനന്തപുരം
അത്‌ലറ്റിക്‌സിലെ മികച്ച ജില്ലകള്‍ക്കുള്ള അവാര്‍ഡുകള്‍ ടൂറിസം വകുപ്പ് മന്ത്രി പി.എ. മുഹമ്മദ് റിയാസ് വിതരണം ചെയ്തു. 247 പോയിന്റ് നേടിയ മലപ്പുറം ജില്ലയാണ് ഒന്നാമത്. പാലക്കാട് (213 പോയിന്റ്) രണ്ടാമതും എറണാകുളം (73 പോയിന്റ് ) മൂന്നാം സ്ഥാനത്തുമെത്തി.
ഗെയിംസിലെ മികച്ച ജില്ല തിരുവനന്തപുരമാണ്. 1213 പോയിന്റാണ് തിരുവനന്തപുരം നേടിയത്. തൃശ്ശൂര്‍ 744 പോയിന്റോടെ രണ്ടാം സ്ഥാനത്തെത്തിയപ്പോള്‍ 673 പോയിന്റോടെ കണ്ണൂര്‍ മൂന്നാമതെത്തി.
- സ്കൂളുകളിൽ താരം ഐഡിയൽ കടകശ്ശേരി
അത്‌ലറ്റിക്‌സിലെ മികച്ച സ്‌കൂളുകൾക്കുള്ള പുരസ്‌കാരം മലപ്പുറം കടകശ്ശേരി ഐഡിയല്‍ ഇ എച്ച് എസ് എസ് സ്വന്തമാക്കി. തിരുവനന്തപുരം ജി വി രാജ സ്‌കൂള്‍ രണ്ടാം സ്ഥാനവും മലപ്പുറം തിരുനാവായ നാവാമുകുന്ദ സ്‌കൂള്‍ മൂന്നാം സ്ഥാനവും നേടി. വിദ്യാഭ്യാസമന്ത്രി വി ശിവന്‍കുട്ടി പുരസ്‌കാരം സമ്മാനിച്ചു.
വിവിധ വിഭാഗങ്ങളിലും തിരുവനന്തപുരം
സീനിയര്‍ കാറ്റഗറിയിൽ 835 പോയിന്റോടെ തിരുവനന്തപുരം മികച്ച ജില്ലയായി. 465 പോയിന്റോടെ മലപ്പുറം രണ്ടാമതും 410 പോയിന്റോടെ തൃശ്ശൂര്‍ മൂന്നാമതുമെത്തി. രജിസ്ട്രേഷ൯ വകുപ്പ് മന്ത്രി രാമചന്ദ്രന്‍ കടന്നപ്പള്ളി പുരസ്‌കാരങ്ങള്‍ വിതരണം ചെയ്തു.
ജൂനിയര്‍ കാറ്റഗറിയിലും തിരുവനന്തപുരം ചാമ്പ്യന്മാരായി. 671 പോയിന്റാണ് തിരുവനന്തപുരത്തിന് ലഭിച്ചത്. 252 പോയിന്റോടെ തൃശ്ശൂര്‍ രണ്ടാമതും 251 പോയിന്റോടെ പാലക്കാട് മൂന്നാമതുമായി. കായികമന്ത്രി വി അബ്ദുറഹ്‌മാന്‍ ട്രോഫി നല്‍കി.
സബ് ജൂനിയര്‍ കാറ്റഗറിയിലും തിരുവനന്തപുരം തന്നെയാണ് ഒന്നാമത്. 429 പോയിന്റാണ് തലസ്ഥാനത്തിന് ലഭിച്ചത്. തൃശ്ശൂരും പാലക്കാടുമാണ് രണ്ടും മൂന്നും സ്ഥാനങ്ങളില്‍. 186 പോയിന്റ് തൃശ്ശൂ൪ നേടിയപ്പോൾ 164 പോയിന്റ് പാലക്കാട് നേടി. ക്ഷീരവികസന വകുപ്പ് മന്ത്രി ജെ ചിഞ്ചുറാണി അവാ൪ഡുകള്‍ വിതരണം ചെയ്തു.
കായിക മേളയിലെ ഭാഗ്യചിഹ്നമായ തക്കുടുവിനെ രൂപകല്പന ചെയ്ത വിനോജ് സുരേന്ദ്രനെയും ലോഗോ ഡിസൈന്‍ ചെയ്ത രാഹുല്‍ രാജിനെയും ചടങ്ങില്‍ വിദ്യാഭ്യാസ മന്ത്രി വി. ശിവ൯കുട്ടി ആദരിച്ചു. സുവനീറിന് ‘ഉജ്വല്‍’ എന്ന് പേര് നി൪ദേശിച്ച കോതമംഗലം സെന്റ് ജോര്‍ജ് സ്‌കൂളിലെ അനുഗ്രഹ് സാബുവിനും ചടങ്ങില്‍ പുരസ്‌കാരം നല്‍കി. സുവനീ൪ വിദ്യാഭ്യാസ മന്ത്രി പ്രകാശനം ചെയ്തു.