മലങ്കര കത്തോലിക്കാ സഭാ മേജർ ആർച്ച്ബിഷപ്പും കർദിനാളുമായ മാർ ബസേലിയോസ് ക്ലീമിസ് കാതോലിക്കാ ബാവായുടെ മെത്രാഭിഷേക രജതജൂബിലി ആഘോഷങ്ങളുടെ സമാപനം നാളെ തിരുവനന്തപുരത്ത് നടക്കും. പട്ടം സെന്റ് മേരീസ് കത്തീഡ്രലിൽ രാവിലെ 8:30-ന് നടക്കുന്ന വിശുദ്ധ കുർബാനയോടെ സമാപന ചടങ്ങുകൾക്ക് തുടക്കമാകും. തുടർന്ന് വിവിധ രംഗങ്ങളിലെ പ്രമുഖർ പങ്കെടുക്കുന്ന ഔദ്യോഗിക സമാപന സമ്മേളനവും സംഘടിപ്പിച്ചിട്ടുണ്ട്.2001 ആഗസ്റ്റ് 15-ന് തിരുമൂലപുരം പള്ളി മുറ്റത്തായിരുന്നു അദ്ദേഹത്തിന്റെ മെത്രാഭിഷേകം. തുടർന്ന് 2006 മെയ് 15-ന് ആർച്ച് ബിഷപ്പായി ഉയർത്തപ്പെട്ട അദ്ദേഹം, 2007 ഫെബ്രുവരി 10-നാണ് മലങ്കര കത്തോലിക്കാസഭയുടെ കാതോലിക്കാ ബാവയായും മേജർ ആർച്ച് ബിഷപ്പായും സ്ഥാനമേറ്റത്. 2012 നവംബറിൽ 52-ാം വയസ്സിൽ കർദിനാൾ പദവിയിലേക്ക് ഉയർത്തപ്പെട്ട അദ്ദേഹം, ഈ പദവിയിലെത്തുന്ന മലങ്കര സഭയിൽ നിന്നുള്ള ആദ്യത്തെ വ്യക്തിയാണ്.കാൽനൂറ്റാണ്ട് പിന്നിട്ട അജപാലന ശുശ്രൂഷയിലൂടെ സഭയ്ക്കും സമൂഹത്തിനും നൽകിയ അമൂല്യ സംഭാവനകളെ ആദരിച്ചാണ് തലസ്ഥാനത്ത് വിപുലമായ സമാപന ചടങ്ങുകൾ ഒരുക്കിയിരിക്കുന്നത്. രജതജൂബിലിയുടെ ഭാഗമായി വയനാട് മുണ്ടക്കൈ-ചൂരൽമല ദുരന്തബാധിതർക്കായി വീടുകൾ നിർമ്മിച്ചു നൽകിയത് ഉൾപ്പെടെയുള്ള നിരവധി ജീവകാരുണ്യ പ്രവർത്തനങ്ങളും സഭയുടെ നേതൃത്വത്തിൽ നടപ്പിലാക്കിയിട്ടുണ്ട്.