ട്വന്റി20 ലോക കപ്പിലെ നിർണായക മത്സരത്തിൽ ഓസ്ട്രേലിയയ്ക്കെതിരെ ഇന്ത്യയ്ക്ക് ആധികാരിക ജയവുമായി സെമിയിൽ.
ബാറ്റിങ്ങിൽ ക്യാപ്റ്റൻ രോഹിത് ശർമയുടെ (41 പന്തിൽ 92 റൺസ്) സംഹാരതാണ്ഡവവും ബോളിങ്ങിൽ കുൽദീപ് യാദവിന്റെ (4 ഓവറിൽ 2ന് 24) സ്പിൻ മാജിക്കും കണ്ട സൂപ്പർ 8 മത്സരത്തിൽ, 24 റൺസ് ജയവുമായി ഇന്ത്യ സെമിഫൈനലിൽ കടന്നു. സൂപ്പർ 8ൽ എല്ലാ മത്സരങ്ങളും ജയിച്ച് ഗ്രൂപ്പ് ചാംപ്യൻമാരായാണ് ഇന്ത്യയുടെ സെമി പ്രവേശം. തോൽവിയോടെ ഓസ്ട്രേലിയയുടെ സെമി സാധ്യത മങ്ങി.
സ്കോർ: ഇന്ത്യ 20 ഓവറിൽ 5ന് 205. ഓസ്ട്രേലിയ 20 ഓവറിൽ 7ന് 181. വെടിക്കെട്ട് ഇന്നിങ്സുമായി ടീമിനെ മുന്നിൽ നിന്നു നയിച്ച രോഹിത്താണ് പ്ലെയർ ഓഫ് ദ് മാച്ച്. 27ന് നടക്കുന്ന സെമിയിൽ ഇംഗ്ലണ്ടാണ് ഇന്ത്യയുടെ എതിരാളികൾ.